२८ असोज, काभ्रेपलाञ्चोक। प्रधानमन्त्री बालेन्द्र शाहले काभ्रेपलाञ्चोक जिल्लामा रहेको प्रसिद्ध धार्मिकस्थल पलाञ्चोक भगवती मन्दिरमा पुगेर दर्शन गरेका छन्।
प्रधानमन्त्री शाह बुधबार बिहान आफ्ना राजनीतिक सल्लाहकार कुमार बेन र पूर्वाधार विकासमन्त्री सुनील लम्सालसहित मन्दिर पुगेका हुन्। नित्य पूजाका क्रममा मन्दिर पुगेका उनले भगवतीको दर्शन गरी फर्किएको पाँचखाल नगरपालिका–९ का वडाध्यक्ष रामकाजी श्रेष्ठले जानकारी दिए।
प्रधानमन्त्री शाहको मन्दिर भ्रमणबारे जिल्लामा रहेका सुरक्षा निकायलाई समेत अग्रिम जानकारी दिइएको थिएन। स्रोतका अनुसार भ्रमणका क्रममा प्रधानमन्त्रीसँग खटिएका सुरक्षाकर्मी पनि सिभिल पोसाकमा थिए।
नवरात्र सुरु भएसँगै पलाञ्चोक भगवती मन्दिरमा धार्मिक गतिविधि बढ्ने गर्छ। नेपालका प्रसिद्ध शक्तिपीठमध्ये एक मानिने यस मन्दिरमा विशेषगरी नवरात्रका अवसरमा दर्शनार्थीको उल्लेख्य भीड लाग्ने गरेको छ।
पलाञ्चोक भगवती मन्दिरमा हरेक वर्ष नवरात्रको अष्टमीका दिन राष्ट्रप्रमुखले दर्शन गर्ने परम्परा छ। धार्मिक तथा ऐतिहासिक महत्त्व बोकेको यस मन्दिरमा प्रधानमन्त्री शाहले पनि दर्शन गरेका हुन्।