सुदूरपश्चिम प्रदेश प्रहरी कार्यालय धनगढीका अनुसार आइतबार र सोमबार गरिएको संयुक्त प्रहरी परिचालनका क्रममा कुल १० लाख ४९ हजार ३८५ रुपैयाँ बराबरका सामान बरामद भएका हुन् । बरामद सामग्री आवश्यक कारबाहीका लागि भन्सार कार्यालयमा बुझाइएको छ ।
प्रदेश प्रहरी कार्यालय र जिल्ला प्रहरीको संयुक्त टोलीले आइतबार मात्रै करिब पाँच लाख १७ हजार रुपैयाँ बराबरका सामान नियन्त्रणमा लिएको थियो । बरामद सामग्रीमा साइकलका पाटपुर्जा, ट्युब, मिठाइ, मोटरसाइकल, माछा र पेय पदार्थ रहेका छन् ।
त्यसैगरी, तीन लाख ७४ हजार २२५ रुपैयाँ बराबरका कपडा, खाद्यान्न तथा किरानाका सामानसमेत बरामद गरिएको प्रहरीले जनाएको छ ।
सोमबार भने अवैध सामान ओसारपसारमा संलग्न रहेको आरोपमा तीन जनालाई पक्राउ गरिएको हो । भीमदत्त नगरपालिका–१८ स्थित कारागार रोडबाट एक लाख ५७ हजार रुपैयाँ बराबरका अवैध सामानसहित उनीहरूलाई नियन्त्रणमा लिइएको प्रहरीले जानकारी दिएको छ ।
पक्राउ पर्नेमा भीमदत्त नगरपालिका–२ का ५० वर्षीय लप्टन चौधरी, वडा नम्बर ११ का किसनदत्त जोशी र वडा नम्बर १७ का लबराज चटौत रहेका छन् ।
प्रहरीका अनुसार उनीहरूको साथबाट भारतीय नम्बर प्लेटको एउटा मोटरसाइकल, चेन स्प्रोकेट, ब्रेक र प्लास्टिकका सामान बरामद गरिएको छ । पक्राउ परेका तीनै जनामाथि आवश्यक कानुनी प्रक्रिया अघि बढाइएको छ ।