१० कात्तिक, काठमाडौं । नेपाल प्रिमियर लिग (एनपीएल) अन्तर्गत आजको पहिलो खेलमा विराटनगर किंग्सले चितवन राइनोजविरुद्ध पहिले बलिङ गर्ने भएको छ।
विराटनगरका कप्तान सन्दीप लामिछानेले टस जितेर बलिङ रोजेका हुन्। टस हारेपछि चितवन राइनोजले पहिले ब्याटिङ गर्नेछ।
चितवनको नेतृत्व आज रवि बोपाराले गरिरहेका छन्। यसअघिका कप्तान कुशल मल्ल भने आजको खेलका लागि घोषित प्लेइङ–११ मा परेका छैनन्।
टसपछि चितवनका कप्तान बोपाराले आफूले पछिल्ला नौ खेलमा टस हारेको उल्लेख गर्दै राम्रो स्कोर बनाएर त्यसको रक्षा गर्ने लक्ष्य रहेको बताए।
आजको खेलमा दुवै टोली जित हासिल गर्दै प्रतियोगितामा आफ्नो स्थिति बलियो बनाउने उद्देश्यसहित मैदानमा उत्रिएका छन्।