मन्त्री लम्सालले सामाजिक सञ्जाल फेसबुकमार्फत २१ सेकेन्डको भिडियो सार्वजनिक गर्दै पुल निर्माणको पछिल्लो अवस्थाबारे जानकारी गराएका हुन्। उनका अनुसार लामो समयदेखि अलपत्र रहेको आयोजनाको काम अहिले तीव्र पारिएको छ।
पुलका निर्माण हुन बाँकी तीन स्पानमध्ये पहिलोको स्ल्याब ढलान सम्पन्न भइसकेको मन्त्री लम्सालले बताए। बाँकी दुई स्पानको स्ल्याब ढलान पनि आगामी पाँच दिनभित्र पूरा गर्ने कार्यतालिका रहेको उनले उल्लेख गरेका छन्।
पुल निर्माणसँगै नदी नियन्त्रणसम्बन्धी कामलाई समेत निरन्तरता दिइएको उनको भनाइ छ। निर्धारित समयमै निर्माण सम्पन्न गरी मंसिरको पहिलो साताभित्र सर्वसाधारणका लागि पुल सञ्चालनमा ल्याउने सरकारको लक्ष्य रहेको उनले स्पष्ट पारे।
मन्त्री लम्सालले १५ वर्षदेखि समस्याग्रस्त अवस्थामा रहेको यस आयोजनालाई सम्पन्न गरी सञ्चालनमा ल्याउनु सरकारको प्राथमिकतामा रहेको बताएका छन्।
यसअघि कमला पुल निर्माणमा भइरहेको ढिलाइ र त्यसका कारण स्थानीयले भोग्नुपरेको समस्याबारे अनलाइनखबरले समाचार प्रकाशित गरेको थियो। पुल निर्माणमा राजनीतिक आश्वासन दोहोरिँदै आए पनि नागरिकको समस्या समाधान हुन नसकेको विषय समाचारमा उठाइएको थियो।
सिरहा र धनुषालाई जोड्ने महत्वपूर्ण यो पुल लामो समयदेखि निर्माण सम्पन्न हुन नसक्दा स्थानीय बासिन्दा, यात्रु तथा व्यवसायीले आवतजावतमा कठिनाइ भोग्दै आएका छन्। पुल सञ्चालनमा आएपछि दुवै जिल्लाका नागरिकलाई आवागमनमा सहज हुने अपेक्षा गरिएको छ।