कर्णाली प्रदेश सरकारको उद्योग, पर्यटन, वन तथा वातावरण मन्त्रालयका अनुसार उक्त अवधिमा ५८ प्रजातिका जडीबुटी बिक्री तथा निकासीबाट सो रकम सङ्कलन भएको हो।
मन्त्रालयका सूचना अधिकारी महेश नेपालीका अनुसार सबैभन्दा बढी राजस्व झ्याउको निकासीबाट प्राप्त भएको छ। प्रतिकेजी ५० रुपैयाँ राजस्व दर रहेको झ्याउ १ लाख ८१ हजार ६०९ केजी निकासी हुँदा ९५ लाख ८५ हजार ४०० रुपैयाँ राजस्व सङ्कलन भएको छ।
त्यस्तै, प्रतिकेजी ७५ रुपैयाँ राजस्व दर निर्धारण गरिएको जटामसी ९६ हजार ७९२ केजी निकासीबाट ८७ लाख ८८ हजार ८७५ रुपैयाँ आम्दानी भएको छ।
यार्सागुम्बा अर्थात् जीवनबुटीबाट ७५ लाख ४४ हजार ३७१ रुपैयाँ राजस्व प्राप्त भएको मन्त्रालयले जनाएको छ। प्रतिकेजी ३१ हजार रुपैयाँ राजस्व दर रहेको यार्सागुम्बा भने २५१ किलो ६५६ ग्राम मात्र बिक्री भएको सूचना अधिकारी नेपालीले जानकारी दिए।
अन्य जडीबुटीमध्ये कटुसीबाट २३ लाख ८१ हजार ६८० रुपैयाँ राजस्व सङ्कलन भएको छ। प्रतिकेजी ४० रुपैयाँ राजस्व दर रहेको कटुसी ३४ हजार ४४५ केजी बिक्री भएको थियो।
त्यसैगरी, प्रतिकेजी २५ रुपैयाँ राजस्व दर रहेको सेतक चिनी ४१ हजार ७३२ केजी निकासी हुँदा २० लाख ४६ हजार ५७५ रुपैयाँ राजस्व प्राप्त भएको छ।
मन्त्रालयका अनुसार टिमुरबाट १९ लाख ३९ हजार ४०० रुपैयाँ, सिलाजितबाट ९ लाख ७७ हजार ८५० रुपैयाँ, सुगन्धवालबाट ९ लाख ५० हजार ५८० रुपैयाँ र रिठ्ठाबाट ९ लाख ४७ हजार ८३८ रुपैयाँ राजस्व सङ्कलन भएको छ।
गत आर्थिक वर्षमा कर्णाली प्रदेशमा कुल २१ लाख ५८ हजार ५८२ दशमलव ९४५ केजी जडीबुटी सङ्कलन भएको थियो। त्यसमध्ये १९ लाख ४६ हजार ८७५ दशमलव ७०५ केजी जडीबुटी प्रदेशबाट निकासी गरिएको उद्योग, पर्यटन, वन तथा वातावरण मन्त्रालयले जनाएको छ।