काठमाडौं । राष्ट्रिय स्वतन्त्र पार्टी (रास्वपा) का सचेतक प्रकाशचन्द्र परियारले आगामी एक दशकभित्र सम्मानजनक मध्यम आय भएको आत्मनिर्भर नेपाल निर्माण गर्ने लक्ष्यसहित पार्टी र सरकार सक्रिय रहेको बताएका छन्।
विराटनगरमा पार्टीका अगुवाहरूसँग आयोजित अन्तर्क्रियामा बोल्दै परियारले विकास, सुशासन, आत्मनिर्भरता र समृद्धिको लक्ष्य पूरा गर्न आफूहरू शपथ ग्रहण गरेकै दिनदेखि निरन्तर काममा जुटेको बताए।
उनका अनुसार रास्वपाले जनतासमक्ष गरेको प्रतिबद्धताअनुसार कामलाई परिणाममुखी बनाउने र सुशासन कायम गर्ने प्रयास गरिरहेको छ।
‘एक दशकभित्र सम्मानजनक मध्यम आय भएको आत्मनिर्भर दक्षिण एसियाली राष्ट्र बनाउने हाम्रो सपना सामान्य प्रयासबाट सम्भव छैन। त्यसैले वाचापत्रअनुसार काम, परिणाम र सुशासन सुनिश्चित गर्न हामी शपथ ग्रहणकै दिनदेखि अहोरात्र खटिरहेका छौँ,’ उनले भने।
परियारले जनताले विकास, समृद्धि र सुशासनप्रति राखेका अपेक्षालाई व्यवहारमा उतार्नु पार्टी र सरकारको मुख्य जिम्मेवारी भएको उल्लेख गरे। जनतासँग गरिएका प्रतिबद्धतालाई वास्तविक उपलब्धिमा बदल्न इमानदार प्रयास भइरहेको उनको भनाइ थियो।
उनले संसद्लाई जनताका समस्या र सरोकारका विषय उठाउने तथा सरकारलाई जवाफदेही बनाउने प्रभावकारी माध्यमका रूपमा उपयोग गर्नुपर्नेमा जोड दिए। जनताका मुद्दालाई प्राथमिकतामा राख्दै आफूहरू निरन्तर सिक्ने, कमजोरी सुधार्ने र आत्मसमीक्षा गर्ने प्रक्रियामा रहेको उनले बताए।
राजनीतिक दल र जनप्रतिनिधिले आफूलाई सधैँ सही ठान्ने प्रवृत्ति त्याग्नुपर्ने भन्दै परियारले नागरिकका प्रश्न, आलोचना र सुझावलाई सकारात्मक रूपमा लिनुपर्ने धारणा राखे।
रास्वपाका नेता, सांसद, मन्त्री तथा अन्य जिम्मेवार व्यक्तिमा पद र शक्तिका कारण अहङ्कार बढ्न सक्ने जोखिमप्रति पनि उनले सचेत गराए। सञ्चारमाध्यम र नागरिक समाजलाई सरकार तथा राजनीतिक नेतृत्वका गतिविधिमाथि निरन्तर निगरानी राख्दै रचनात्मक खबरदारी गर्न उनले आग्रह गरे।
‘हामीबाट पनि कमजोरी हुन सक्छ। गलत काम वा कार्यशैली देखिएमा खबरदारी गर्नुस्। पद र शक्तिको अहङ्कार बढ्न नदिन सञ्चारमाध्यम र नागरिक समाजको रचनात्मक निगरानी आवश्यक छ,’ परियारले भने।