काठमाडौं । राष्ट्रिय सभाका सदस्यहरूले भोटेकोशी नदीमा आएको विनाशकारी बाढीबाट भएको अकल्पनीय जनधनको क्षतिप्रति गहिरो चिन्ता व्यक्त गर्दै सरकारको ध्यानाकर्षण गराएका छन् ।
बुधबार बसेको राष्ट्रिय सभाको बैठकको शून्य समयमा बोल्दै सांसदहरूले बेपत्ता नागरिकको खोजीलाई तीव्र बनाउन, प्रभावकारी रूपमा राहत वितरण गर्न तथा ‘राष्ट्रिय शोक दिवस’ घोषणा गर्न सरकारसँग माग गरेका हुन् ।
बैठकमा बोल्दै सांसद कमला पन्तले मनसुनजन्य विपद्का विषयमा संसद्मा पटक–पटक पूर्वसावधानी अपनाउन ध्यानाकर्षण गराउँदा पनि सरकारले बेवास्ता गरेको भन्दै आपत्ति जनाइन् । जलवायु परिवर्तनका कारण यस्ता विपद्को जोखिम बढ्दै गएको भन्दै उनले चेतावनीलाई बेवास्ता नगरी तत्काल उद्धारमा राज्यको सम्पूर्ण शक्ति परिचालन गर्न आग्रह गरिन् ।
सांसद मदनकुमारी शाहले बाढीका कारण ९ सयभन्दा बढीको मृत्यु र हजारौँ नागरिक बेपत्ता भएको जानकारी दिँदै १७ हजारभन्दा बढी बालबालिका प्रभावित भएको बताइन् । उनले ‘अरूको विकासका कारण हामीले विनाश भोग्नुपरेको’ उल्लेख गर्दै राष्ट्रिय झण्डा झुकाएर शोक व्यक्त गर्न तथा सेल्टरमा रहेका महिला र बालबालिकाको सुरक्षामा विशेष ध्यान दिन माग गरिन् ।
अर्का सांसद युवराज शर्माले नेपालको कमजोर पूर्वसूचना प्रणालीलाई अत्याधुनिक बनाउनुपर्नेमा जोड दिए । उनले प्रचारभन्दा पनि परिणाममुखी काम गर्न सरकारलाई सुझाव दिँदै राहत तथा पुनर्स्थापनामा ढिलाइ भए महामारीको अर्को संकट निम्तिन सक्ने चेतावनी दिए ।
विपद्को समयमा राहत वितरणका लागि अपनाइएको ‘एकद्वार प्रणाली’ ले पीडितलाई थप आक्रान्त बनाएको भन्दै सांसद नरबहादुर विष्टले त्यसको कडा निगरानी गर्न सरकारसँग आग्रह गरे ।
सांसद नारायणदत्त मिश्रले १५ दिनसम्म सम्पर्कमा नआएका बेपत्ता व्यक्तिलाई मृतक घोषणा गरी आवश्यक प्रक्रिया अघि बढाउन सुझाव दिए । उनले नदी किनारबाट निश्चित दूरी कायम गरेर मात्र सडक तथा भवन निर्माण गर्ने नीति ल्याउनसमेत सरकारको ध्यानाकर्षण गराए ।
सांसद जयन्तीदेवी राईले सडक, विद्युत् तथा सञ्चार सेवा विच्छेद भएका कारण प्रभावित क्षेत्रमा राहत पुर्याउन कठिनाइ भइरहेको बताइन् । काठमाडौं प्रवेश गरेका विस्थापितका लागि होल्डिङ सेन्टर तथा गुम्बाहरूमा उचित व्यवस्थापन गर्न उनले माग गरिन् ।
यस्तै, सांसद राजेन्द्रलक्ष्मी गैरेले सुरुङ तथा भग्नावशेषमा पुरिएका व्यक्तिको खोजीमा तदारुकता देखाउन सरकारको ध्यानाकर्षण गराइन् । दीर्घरोगीका लागि आवश्यक औषधिको व्यवस्था गर्नसमेत उनले माग गरिन् ।
सांसद सुरेशकुमार आले मगरले विकसित राष्ट्रहरूको पुँजीवादी विकासका कारण वातावरणीय सन्तुलन बिग्रिएको र त्यसको मूल्य नेपालजस्ता मुलुकले चुकाउनुपरेको बताए । जलवायु परिवर्तनबाट नेपालले भोगिरहेको क्षतिबारे अन्तर्राष्ट्रिय समुदायको ध्यानाकर्षण गराउन उनले सरकारसँग माग गरे ।
सांसद सोनाम ग्याल्जेन शेर्पाले विपद्को यस घडीमा सबै पक्ष एकजुट हुन आह्वान गर्दै खोज तथा उद्धारमा खटिएका सुरक्षाकर्मी तथा विभिन्न संघसंस्थाप्रति आभार व्यक्त गरे ।
बैठकमा सांसद भुवनबहादुर सुनारले मुलुक विपत्तिमा परेका बेला प्रधानमन्त्रीको मुस्ताङ भ्रमण तथा त्यहाँ भएका भेटघाटका विषयमा जनस्तरबाट उठेका आशंकाबारे सरकारले स्पष्ट पार्नुपर्ने माग गरे ।
सांसदहरूले भोटेकोशी बाढीमा ज्यान गुमाएकाहरूप्रति श्रद्धाञ्जली व्यक्त गर्दै घाइतेहरूको शीघ्र स्वास्थ्यलाभको कामनासमेत गरेका छन् ।
– न्युज एजेन्सी नेपाल