काठमाडौं । सर्वोच्च अदालतको पूर्ण बैठक कुनै ठोस निर्णयमा पुग्न नसकेपछि सोमबार पुनः बस्ने भएको छ। न्यायपालिका र न्यायाधीशहरूमाथि पछिल्लो समय उठेका विवाद तथा प्रश्नबारे साझा निष्कर्ष निकाल्ने उद्देश्यले बोलाइएको बैठक निष्कर्षविहीन बनेको हो।
शुक्रबार बसेको बैठकमा प्रधानन्यायाधीश डा. मनोजकुमार शर्मासहित सर्वोच्च अदालतका १६ न्यायाधीशमध्ये १४ जना सहभागी थिए। वरिष्ठतम न्यायाधीश सपना प्रधान मल्ल विदेशमा रहेकी र न्यायाधीश अब्दुल अजिज मुसलमान अनुपस्थित भएकाले बैठकमा उपस्थित हुन सकेनन्।
करिब एक घण्टा चलेको छलफलमा न्यायाधीशहरूबीच फरक–फरक धारणा आएपछि सहमति जुट्न नसकेको स्रोतले जनाएको छ।
सञ्चारमाध्यममा बिचौलियाका रूपमा चर्चा गरिएका इनाम सापकोटासँग प्रधानन्यायाधीश शर्मा र न्यायाधीश हरिप्रसाद फुयाँलको नाम जोडिएपछि उत्पन्न परिस्थितिबारे छलफल गर्न पूर्ण बैठक बोलाइएको थियो।
बैठकमा केही न्यायाधीशले उक्त प्रकरणबारे आन्तरिक अध्ययन तथा छानबिन समिति गठन गर्नुपर्ने प्रस्ताव राखेका थिए। तर, त्यस विषयमा साझा निर्णय हुन सकेन।
शुक्रबारको बैठकबाट कुनै निष्कर्ष ननिस्किएपछि सोमबार पुनः छलफल गर्ने सहमतिसहित न्यायाधीशहरू बाहिरिएका छन्। सोमबारको बैठकमा न्यायाधीश सपना प्रधान मल्ल र अब्दुल अजिज मुसलमानसमेत सहभागी हुने अपेक्षा गरिएको छ।
त्यतिञ्जेल यस विषयमा थप निर्णय नगरी परिस्थिति हेर्ने रणनीति अपनाइएको स्रोतको भनाइ छ।