फिलिपिन्सको उत्तरी क्षेत्रस्थित अल्बे प्रान्तमा रहेको चर्चित तथा अत्यधिक सक्रिय मायोन ज्वालामुखी शुक्रबार मध्याह्न विस्फोट भएको छ ।
फिलिपिन्स इन्स्टिच्युट अफ भोल्क्यानोलोजी एन्ड सिस्मोलोजी (फिभोल्क्स)का अनुसार स्थानीय समयअनुसार बिहान ११ः५३ बजे सुरु भएको मध्यम स्तरको विस्फोट करिब ६ मिनेटसम्म जारी रहेको थियो । विस्फोटका कारण आकाशमा तीन हजार मिटर अग्लो खरानीको मुस्लो फैलिएको छ ।
फिभोल्क्सले जारी गरेको विज्ञप्तिअनुसार विस्फोटबाट निस्किएको खरानी र धुलो पश्चिम तथा दक्षिण–पश्चिम दिशातर्फ फैलिने अनुमान गरिएको छ । विस्फोटको तीव्रता र म्याग्माको सक्रियतालाई ध्यानमा राख्दै निकायले सतर्कता स्तर २ बाट बढाएर ३ पुर्याएको छ ।
अधिकतम पाँच तहको मापन प्रणालीमा स्तर ३ ले ज्वालामुखी म्याग्मा विस्फोटको नयाँ चरणमा प्रवेश गरेको र आगामी दिनमा लाभा प्रवाह तथा घातक ‘पाइरोक्लास्टिक डेन्सिटी करेन्ट’को सम्भावना उच्च रहेको संकेत गर्छ ।
सम्भावित मानवीय क्षति रोक्न अधिकारीहरूले ज्वालामुखीको ६ किलोमिटर वरपर रहेको ‘स्थायी जोखिम क्षेत्र’बाट सर्वसाधारणलाई तत्काल सुरक्षित स्थानमा स्थानान्तरण गर्न स्थानीय प्रशासनलाई सिफारिस गरेका छन् ।
ज्वालामुखीको माथिल्लो तथा मध्य भूभागमा तातो लाभा र ढुङ्गासहितको बहाव तीव्र हुन सक्ने चेतावनीसमेत दिइएको छ ।
यसैगरी, खरानीको बाक्लो मुस्लो र धुवाँका कारण हवाई उडान प्रभावित हुन सक्ने जोखिमलाई ध्यानमा राख्दै नागरिक उड्डयन प्राधिकरणलाई सतर्क गराइएको छ । विमान चालकहरूलाई ज्वालामुखीको चुचुरो आसपासको आकाशमा उडान नगर्न र सुरक्षित हवाई मार्ग प्रयोग गर्न निर्देशन जारी गरिएको छ ।
आफ्नो लगभग पूर्ण सममित शंकु आकारका लागि विश्वभर प्रख्यात मायोन फिलिपिन्सका २४ सक्रिय ज्वालामुखीमध्ये सबैभन्दा संवेदनशील मानिन्छ । यसअघि पनि पटक–पटक भएका घातक विस्फोटका कारण यस क्षेत्रबाट हजारौँ मानिसलाई सामूहिक रूपमा विस्थापित गर्नुपरेको इतिहास छ ।
पछिल्लो विस्फोटसँगै स्थानीय विपद् व्यवस्थापन निकायहरूलाई उच्च सतर्कतामा राखिएको छ ।