यसअघि साँघुरो र पुरानो भवनबाट प्रशासनिक काम, प्रहरी आवास, हिरासत व्यवस्थापन तथा हातहतियार भण्डारण गर्नुपर्ने अवस्था थियो। पर्याप्त आवासको व्यवस्था नहुँदा केही प्रहरी कर्मचारी निजी भाडाका कोठामा बस्दै आएका थिए। नयाँ संरचना निर्माण भएपछि उनीहरू कार्यालय परिसरभित्रै बस्न पाउने भएका छन्।
जिल्ला प्रहरी कार्यालयका प्रमुख प्रहरी उपरीक्षक फडिन्द्र प्रसाईँका अनुसार एउटै पुरानो भवनबाट विभिन्न प्रकृतिका काम सञ्चालन गर्नुपर्दा प्रहरीको दैनिक कार्यसम्पादनमा कठिनाइ हुँदै आएको थियो। अहिले ब्यारेक, हिरासत कक्ष, वरिष्ठ प्रहरी अधिकृतको आवास र कार्यालय प्रमुखको निवाससहितका संरचना तयार भएका छन्।
निर्माण योजनाअन्तर्गत ब्यारेक, हिरासत भवन, प्रहरी अधिकृतका आवासीय भवन, मोटर ग्यारेज, सुरक्षा पर्खाल र प्रवेशद्वार निर्माण गरिएको छ। पुरानो कार्यालय भवनको समेत मर्मतसम्भार तथा सौन्दर्यकरण गरिएको छ।
नवनिर्मित ब्यारेक भवनमा प्रहरी कर्मचारीका लागि आवास, मेस र भण्डारकक्षको व्यवस्था गरिएको छ। दुई तलाको उक्त भवन आठ हजार ६७१ वर्गफिट क्षेत्रफलमा फैलिएको छ। यहाँ एकैपटक १४० जना प्रहरी कर्मचारी बस्न सक्ने क्षमता रहेको छ। महिला प्रहरीका लागि पनि छुट्टै सुविधासम्पन्न ब्यारेक निर्माण गरिएको छ।
त्यसैगरी, हिरासत व्यवस्थापनलाई व्यवस्थित बनाउन महिला र पुरुषका लागि अलग-अलग हिरासत कक्ष तयार गरिएको छ। हिरासत भवनमा सुरक्षा कक्ष, भेटघाट कक्ष, नाबालिगका लागि दुई वटा छुट्टै कक्ष, अन्तर्वार्ता कक्ष तथा हातहतियार भण्डारण कक्षसमेत राखिएको छ। शौचालयको सुविधासहित निर्माण गरिएका नयाँ हिरासत कक्षले थुनुवाको व्यवस्थापनलाई सहज बनाउने अपेक्षा गरिएको छ।
प्रहरी अधिकृत तथा कार्यालय प्रमुखका लागि दुई वटा आवासीय भवनसमेत निर्माण गरिएका छन्। यसअघि जिल्ला प्रहरी कार्यालयका प्रमुखको निवास पुरानो अञ्चल प्रहरी कार्यालयबाट सञ्चालन हुँदै आएको थियो।
नयाँ भवन र सुविधाले प्रहरीको कार्यसम्पादन, सुरक्षा व्यवस्थापन तथा नागरिकलाई प्रदान गरिने सेवामा सुधार आउने प्रहरीको विश्वास छ। व्यवस्थित आवास र कार्यस्थल उपलब्ध हुँदा प्रहरी कर्मचारीको मनोबलसमेत उच्च हुने अपेक्षा गरिएको छ।
यद्यपि, जिल्ला प्रहरी कार्यालयको पूर्वाधारमा सुधार आए पनि जिल्लाका अन्य प्रहरी चौकीको अवस्था भने अझै चुनौतीपूर्ण छ। बागलुङका १५ वटा प्रहरी चौकी अहिले पनि भाडाका भवनबाट सञ्चालन भइरहेका छन्।
प्रहरी उपरीक्षक प्रसाईँका अनुसार जिल्लाका आठ वटा प्रहरी चौकीसँग आफ्नै जग्गा छैन। बाँकी सात वटा चौकीको जग्गा भए पनि भवन निर्माण हुन सकेको छैन।
जिल्लाको मुख्य प्रवेशद्वारका रूपमा रहेको मालढुङ्गास्थित प्रहरी चौकी भवन अभावमा विगत चार वर्षदेखि घाटको सत्तलबाट सञ्चालन हुँदै आएको छ। उक्त चौकीका लागि भने हालै नयाँ भवन निर्माणको शिलान्यास गरिएको छ।