युक्रेनको दक्षिणी जापोरिजिया क्षेत्रमा रुसी सेनाले गरेको हवाई आक्रमणमा कम्तीमा २६ जनाको ज्यान गएको छ ।
आक्रमणमा पाँच जना घाइते भएका छन् भने २७ जना अझै सम्पर्कविहीन रहेको प्रारम्भिक विवरण छ ।
युक्रेन । युक्रेनको दक्षिणी क्षेत्र जापोरिजियास्थित कोमिशुवाखा गाउँमा रुसी सेनाले गरेको हवाई आक्रमणमा ठूलो मानवीय क्षति भएको छ । आक्रमणमा परी २६ जनाको मृत्यु भएको छ भने पाँच जना घाइते भएका छन् ।
बीबीसीका अनुसार घटनापछि २७ जना बेपत्ता रहेको विवरण सार्वजनिक भएको छ । आक्रमणका क्रममा राहत सामग्री वितरणका लागि प्रयोग भइरहेको केन्द्रलाई समेत निशाना बनाइएको बताइएको छ ।
युक्रेनी राष्ट्रपति भोलोदिमिर जेलेन्स्कीले घटनाप्रति दुःख व्यक्त गर्दै यसलाई अत्यन्त भयावह आक्रमणको संज्ञा दिएका छन् । उनले रुसी आक्रमणको निन्दासमेत गरेका छन् ।
क्षेत्रीय प्रमुख मायखाइलो सेमिकिनलाई उद्धृत गर्दै प्रकाशित समाचारअनुसार उक्त गाउँमा कम्तीमा नौवटा हवाई बम प्रहार गरिएको थियो । तीमध्ये प्रत्येक बमको तौल करिब तीन हजार किलोग्राम रहेको जनाइएको छ ।
आक्रमणपछि उद्धार तथा बेपत्ताहरूको खोजीसम्बन्धी विवरण सार्वजनिक भइरहेका छन् । घटनाबारे रुसी सेनाले भने अहिलेसम्म कुनै आधिकारिक प्रतिक्रिया दिएको छैन ।