सप्तरी । संगठन विस्तारलाई प्राथमिकता दिँदै अघि बढेको हुंकार मधेशले सप्तरीमा ३४ सदस्यीय जिल्ला अभियन्ता समूह गठन गरेको छ ।
सप्तरीमा सम्पन्न संगठनको पहिलो जिल्ला भेलाले शैशव राजुको नेतृत्वमा नयाँ जिल्ला अभियन्ता समूह चयन गरेको हो ।
भेलामा हुंकार मधेशका केन्द्रीय प्रवक्ता केशव कुमारले नेपालको लामो राजनीतिक अभ्यासका बाबजुद पनि जनताको आवश्यकता र अपेक्षा सम्बोधन गर्न सक्ने सक्षम राजनीतिक दल निर्माण हुन नसकेको टिप्पणी गरे ।
उनले राजनीतिक दलहरूले सामूहिक पहिचान र अधिकारका विषयमा स्पष्ट वैचारिक आधार बनाउन नसकेको बताए । साथै, पार्टी सञ्चालन, सदस्यहरूको आर्थिक अवस्था र धर्म, राजनीति तथा दर्शनबीचको सम्बन्धबारे समेत दलहरू स्पष्ट हुन नसकेको उनको भनाइ थियो ।
दलहरू लोकतान्त्रिक प्रक्रिया र विधिअनुसार सञ्चालन हुन नसक्नु तथा नेतृत्वमा लामो समयसम्म एउटै व्यक्तिको वर्चस्व कायम रहने प्रवृत्ति पनि राजनीतिक कमजोरीका रूपमा रहेको उनले उल्लेख गरे । यी समस्याको विकल्प प्रस्तुत गर्दै राजनीतिक, सामाजिक र आर्थिक रूपान्तरणको लक्ष्यसहित हुंकार मधेश स्थापना गरिएको उनले बताए ।
कार्यक्रममा संगठनका आर्थिक विभाग प्रमुख एवं केन्द्रीय अभियन्ता सचिदानन्द झाले मधेशी समुदायको आर्थिक आत्मनिर्भरता र जातीय विभेदको अन्त्यलाई मधेशको मुक्तिका लागि आवश्यक सर्तका रूपमा प्रस्तुत गरे ।
भेलामा चन्द्रानन्द ज्योतिष, मनोज कुमार, बैजु स्वामी, सम्बोध कुमार, भोगेन्द्र मण्डल र डा. विशेष यादवसहितका वक्ताहरूले शुभकामना मन्तव्य राखेका थिए ।
नवनिर्वाचित जिल्ला अभियन्ता समूहले सप्तरीमा संगठनको पहुँच विस्तार गर्दै आगामी अभियानलाई प्रभावकारी बनाउने निर्णय गरेको छ ।
यसैबीच, हुंकार मधेशले आगामी मंसिरको पहिलो सातादेखि मेची–महाकाली हुंकार हुलाकी यात्रा सञ्चालन गर्ने तयारीसमेत गरेको छ ।