काठमाडौं । प्रधानमन्त्री बालेन शाहका प्रमुख सल्लाहकार कुमार बेनले बिचौलिया इनम सापकोटाको मोबाइल फरेन्सिक परीक्षणका लागि पठाउनुअघि दुई दिनसम्म आफूसँग राखेको भन्ने विषयमा सरकारका प्रवक्ता सस्मित पोखरेलले अनभिज्ञता जनाएका छन्।
मन्त्रिपरिषद् बैठकपछि सञ्चारकर्मीले यसबारे प्रश्न गरेपछि पोखरेलले उक्त विषयको आधिकारिक पुष्टि नभएको बताए। आफूले पनि बाहिर चलेको हल्ला मात्र सुनेको उल्लेख गर्दै उनले सामाजिक सञ्जालमा आएका विवरणलाई आधिकारिक तथ्यका रूपमा लिन नमिल्ने धारणा राखे।
उनले यस विषयमा कुनै तथ्य भए प्रहरी तथा सम्बन्धित अनुसन्धान निकायले छानबिन गर्ने बताए।
सरकार कुनै पनि अनुसन्धानमा कसैको पक्ष वा विपक्षमा नउभिने स्पष्ट पार्दै पोखरेलले अनुसन्धानसँग सम्बन्धित आधिकारिक तथा गोप्य विवरण बाहिरिन नहुने बताए। यदि त्यस्ता सूचना बाहिरिएको भए त्यसमा कसको कमजोरी रहेको हो भन्नेबारे छानबिन गरी आवश्यक कारबाही अघि बढाउनुपर्ने उनको भनाइ थियो।
उनले अनुसन्धानका विषयमा सरकारले तथ्य र आधिकारिक निष्कर्षलाई मात्रै आधार मान्ने पनि बताए।