- संसदीय सुनुवाइ समितिले सर्वोच्च अदालतका लागि सिफारिस भएका चार न्यायाधीशको सुनुवाइ दुई दिन गर्ने निर्णय गरेको छ।
- शुक्रबार डा. रत्नबहादुर वाग्चन्द र चन्द्रबहादुर सारू तथा शनिबार जनक पाण्डे र गोकर्ण डाँगीको सुनुवाइ हुनेछ।
- प्रस्तावित न्यायाधीशमध्ये वाग्चन्दविरुद्ध पाँच, सारूविरुद्ध छ, पाण्डेविरुद्ध १० र डाँगीविरुद्ध सात उजुरी परेका छन्।
१९ कात्तिक, काठमाडौं । सर्वोच्च अदालतको न्यायाधीश पदका लागि प्रस्तावित चार जनाको संसदीय सुनुवाइ शुक्रबार र शनिबार हुने भएको छ ।
सिंहदरबारमा बिहीबार बसेको संसदीय सुनुवाइ समितिको बैठकले न्यायाधीशहरूको सुनुवाइसम्बन्धी सचिवालयले तयार पारेको कार्यतालिका स्वीकृत गरेको हो ।
निर्धारित कार्यतालिकाअनुसार शुक्रबार उजुरीकर्तासँग छलफल गरिनेछ । त्यसपछि प्रस्तावित न्यायाधीशद्वय डा. रत्नबहादुर वाग्चन्द र चन्द्रबहादुर सारूको सुनुवाइ हुनेछ ।
त्यसैगरी, शनिबार जनक पाण्डे र गोकर्ण डाँगीको संसदीय सुनुवाइ गर्ने कार्यक्रम रहेको समितिले जनाएको छ ।
समिति सभापति बोधनारायण श्रेष्ठका अनुसार प्रस्तावित न्यायाधीशमध्ये डा. वाग्चन्दविरुद्ध पाँच, सारूविरुद्ध छ, पाण्डेविरुद्ध १० र डाँगीविरुद्ध सातवटा उजुरी परेका छन् ।