काठमाडौं । प्रहरी महानिरीक्षक (आईजीपी) पदबाट हटाउने मन्त्रिपरिषद्को निर्णय बदर गरी पुनर्बहालीको मागसहित दानबहादुर कार्कीले दायर गरेको रिट निवेदन सर्वोच्च अदालतमा दर्ता भएको छ।
कार्कीले बिहीबार सर्वोच्चमा पेस गरेको रिट दर्ता भए पनि त्यसको सुनुवाइका लागि पेसी भने तोकिएको छैन।
आफूलाई कुनै सुनुवाइको अवसर नदिई पर्याप्त आधार र कारणबिनै प्रहरी प्रमुखको जिम्मेवारीबाट हटाइएको कार्कीको जिकिर छ। उनले उक्त निर्णय गैरकानुनी रहेको दाबी गर्दै आईजीपी पदमा पुनःस्थापित गर्न माग गरेका छन्।
मन्त्रिपरिषद्ले कात्तिक १८ गते गरेको निर्णयअनुसार कार्कीलाई प्रहरी महानिरीक्षकबाट हटाएर प्रधानमन्त्रीको सुरक्षा सल्लाहकारको जिम्मेवारी दिइएको थियो।
सरकारको निर्णयपछि डा. मनोजकुमार केसीले बुधबारदेखि नेपाल प्रहरीको प्रमुखका रूपमा कार्यभार सम्हालिसकेका छन्।