भोजपुरको अरुण गाउँपालिका–१ याङपाङ निवासी जोगीले प्रत्येक वर्ष कात्तिक, चैत र साउन महिनामा गाउँघर पुगेर रातको समयमा फेरी लगाउने गरेका छन्। उनका अनुसार प्रत्येक महिना करिब २० देखि २५ दिनसम्म गाउँबस्ती घुमेर यो परम्परागत कर्म गर्दै आएका छन्।
स्थानीय धार्मिक मान्यताअनुसार फेरी लगाउँदा घरपरिवारमा सुख, शान्ति, समृद्धि र कल्याण प्राप्त हुने विश्वास गरिन्छ। परम्पराअनुसार जोगीहरू रातको समयमा घरघरमा पुगेर मन्त्र उच्चारणसहित धार्मिक विधिबाट फेरी लगाउने गर्छन्। स्थानीय समुदायले यसलाई आफ्नो धार्मिक आस्था र सांस्कृतिक पहिचानसँग जोडेर हेर्ने गरेका छन्।
फेरी लगाउन घरमा आउने जोगीलाई स्थानीयले आफ्नो क्षमताअनुसार चामल, धान, मकै, कोदो, नगद तथा अन्य अन्नपात दिने चलन छ। यसबाट फेरी लगाउने व्यक्तिको जीविकोपार्जनमा सहयोग पुग्नुका साथै गाउँसमाजमा पुरानो धार्मिक तथा सांस्कृतिक सम्बन्ध पनि कायम रहँदै आएको छ।
कुनै समय याङपाङमा १८ देखि २० घरपरिवारले फेरी लगाउने पेसा अपनाउँदै आएका थिए। तर, पछिल्लो समय यो संख्या घटेर दुई जनामा सीमित भएको अर्जुन जोगीले बताए।
नयाँ पुस्ता आधुनिक पेसा र जीवनशैलीतर्फ आकर्षित हुँदै जाँदा पुर्खौँदेखि चल्दै आएको परम्परा संकटमा परेको उनको भनाइ छ।
स्थानीय मौलिक संस्कृति र पुर्ख्यौली परम्परालाई भावी पुस्तासम्म हस्तान्तरण गर्ने उद्देश्यले आफूले फेरी लगाउने कामलाई निरन्तरता दिएको जोगीले बताए।
उनका अनुसार परम्परागत पेसाको संरक्षणका लागि नयाँ पुस्तालाई यसको धार्मिक, सांस्कृतिक र सामाजिक महत्त्वबारे जानकारी गराउन आवश्यक छ। समयमै संरक्षणका प्रयास नगरिए पुस्तौँदेखि चल्दै आएको फेरी लगाउने परम्परा पूर्ण रूपमा हराउन सक्ने चिन्ता उनले व्यक्त गरे।