बाजुरा । उच्च हिमाली क्षेत्रमा चिसो बढ्न थालेपछि बाजुराका भेडापालक किसान भेडीगोठसहित बेँसीतर्फ झर्न थालेका छन्। कात्तिक दोस्रो साता भएको वर्षा र हिमपातपछि तापक्रम घट्दा भेडाबाख्राका लागि चरनको समस्या हुन थालेपछि किसानले मौसमी बसाइँसराइ सुरु गरेका हुन्।
बूढीनन्दा नगरपालिका–९ का भेडापालक किसान सुमन थापा परिवारसहित बेँसी झरेका छन्। अत्यधिक चिसो बढेपछि आमाबुबा, श्रीमती र छोराछोरीलाई साथमा लिएर २०० भेडासहित अछामको गैलतर्फ लागेको उनले बताए।
साँफे–मार्तडी सडकखण्ड हुँदै बेँसी झरेका थापाका अनुसार गाउँमा हिउँ पर्न थालेपछि भेडा चराउन कठिन भएको छ। त्यसैले चैत–वैशाखसम्म बेँसीमै बस्ने योजना बनाएको उनले बताए।
हिउँदमा चिसोबाट पशुचौपायालाई जोगाउन र चरनको व्यवस्था मिलाउन बाजुराका भेडापालक किसानले वर्षौंदेखि मौसमी बसाइँसराइ गर्दै आएका छन्। उच्च लेकाली क्षेत्रमा तापक्रम घटेसँगै घाँसको अभाव हुने भएकाले उनीहरू भेडाको बथानसहित न्यानो र चरन उपलब्ध हुने क्षेत्रतर्फ जाने गर्छन्।
जिल्लाका उच्च हिमाली भेगका भेडापालक किसान हिउँदमा बूढीगंगा र खप्तड छेडेदहलगायतका क्षेत्रका साथै छिमेकी जिल्ला डोटी र अछामका विभिन्न स्थानमा पुगेर बस्ने गरेका छन्।
पुस्तौँदेखि चल्दै आएको यस्तो मौसमी बसाइँसराइ बाजुराको परम्परागत पशुपालन र ग्रामीण जीवनशैलीको महत्त्वपूर्ण हिस्सा बनेको छ।