काठमाडौं । राष्ट्रिय स्वतन्त्र पार्टी (रास्वपा) का सांसद सोम शर्माले जेन–जी आन्दोलनका क्रममा पक्राउ परेका सबैलाई तत्काल रिहा गर्न सरकारसँग माग गर्नुभएको छ।
जेन–जी शहीद दिवसका अवसरमा आयोजित कार्यक्रममा बोल्दै उहाँले आन्दोलनमा सहभागी भएकाहरूलाई अपराधीको व्यवहार नगर्न सरकारलाई आग्रह गर्नुभयो। ‘जेन–जी आन्दोलन देश जलाउन होइन, देश बनाउनका लागि भएको हो,’ उहाँले भन्नुभयो।
सांसद शर्माले आन्दोलनका क्रममा पक्राउ परेकाहरूलाई सम्मान गर्नुपर्ने बताउँदै उनीहरूको तत्काल रिहाइका लागि गृहमन्त्री र कानुनमन्त्रीको ध्यानाकर्षण गराउनुभयो।
उहाँले आन्दोलनका क्रममा घाइते भएकाहरूको उपचारमा पनि सरकारले तत्काल पहल गर्नुपर्ने बताउनुभयो। स्वदेशमा उपचार सम्भव नभएका घाइतेलाई आवश्यक परे विदेश लगेर भए पनि उपचार गराउनुपर्ने उहाँको माग छ।
शर्माले आगामी दिनमा भदौ २३ जस्तो दुःखद् घटना दोहोरिन नदिन राज्य, सरकार र नागरिकबीचको सम्बन्ध सुमधुर बनाउनुपर्नेमा जोड दिनुभयो। नागरिकले देश बनाउनका लागि आफ्नो ज्यान दिनुपर्ने अवस्था फेरि आउन नहुने उहाँको भनाइ छ।