काठमाडौं । जेन–जी आन्दोलनका घाइते प्रतिश श्रेष्ठले सरकारले जेन–जीसँग गरेको १० बुँदे सम्झौता कार्यान्वयनमा तदारुकता नदेखाएको आरोप लगाउनुभएको छ।
जेन–जी शहीद दिवसका अवसरमा आयोजित कार्यक्रममा बोल्दै श्रेष्ठले आन्दोलनका क्रममा मृत्यु भएकाहरूलाई अझै पूर्ण रूपमा शहीद घोषणा नगरिएको, घाइतेको उपचार तथा पुनःस्थापना प्रभावकारी नभएको र सबै घाइतेले कृत्रिम अङ्ग तथा डिजिटल कार्डसमेत नपाएको गुनासो गर्नुभयो।
उहाँले शहीद परिवार तथा घाइतेका लागि शिक्षा, रोजगारी, आर्थिक सुरक्षा, उच्चस्तरीय आयोग गठन र संविधान संशोधनलगायतका विषय सम्झौतामा समेटिए पनि अधिकांश विषय कागजमै सीमित रहेको दाबी गर्नुभयो।
श्रेष्ठले सरकारसँग भएको सम्झौता कागज र शपथपत्रमा मात्र नभई व्यवहारमै कार्यान्वयन हुनुपर्ने माग गर्नुभयो। साथै, घाइतेहरूका लागि योग्यता र क्षमताअनुसार सरकारी तथा निजी क्षेत्रमा स्थायी रोजगारीको व्यवस्था गर्न सरकारसँग आग्रह गर्नुभयो।
उहाँले जेन–जी आन्दोलनको बलिदानकै आधारमा वर्तमान सरकार बनेको दाबी गर्दै सरकारले आन्दोलनका शहीद र घाइतेलाई बिर्सन नहुने बताउनुभयो।
‘हामी घाइते छौँ तर हारेका छैनौँ, न्याय नपाएसम्म संघर्ष जारी राख्छौँ,’ श्रेष्ठले भन्नुभयो।