काठमाडौं । सरकारले सरकारी निकायबाट हुने खरिद तथा कार्यालय प्रयोजनमा स्वदेशी उत्पादनलाई प्राथमिकता दिन सबै सरकारी कार्यालयलाई पत्राचार गरेको छ।
शुक्रबार सिंहदरबारस्थित प्रधानमन्त्री तथा मन्त्रिपरिषद्को कार्यालयमा आयोजित पत्रकार सम्मेलनमा प्रधानमन्त्री कार्यालयका प्रवक्ता तथा सहसचिव हेमराज अर्यालले स्थानीय सीप तथा उद्यमको संरक्षण, रोजगारी सिर्जना र आयात प्रतिस्थापन गर्ने उद्देश्यले सरकारी खरिदमा नेपाली उत्पादनलाई प्राथमिकता दिन पुनःस्मरणसहित पत्राचार गरिएको जानकारी दिएका हुन्।
उनका अनुसार सरकारी कार्यालयमा हुने बैठक तथा समारोहका कोसेली, उपहार, सजावटलगायतका प्रयोजनमा सम्भव भएसम्म नेपाली हस्तकला तथा नेपालमै उत्पादित वस्तु प्रयोग गर्न निर्देशन दिइएको छ।
त्यस्तै, स्टेसनरी, छपाइ तथा फर्निचरसँग सम्बन्धित वस्तु, निर्माण सामग्री, मेसिनरी तथा उपकरण, कृषि तथा पशुजन्य उत्पादन, खाद्य तथा पेय पदार्थ खरिद गर्दा प्रचलित कानून तथा सार्वजनिक खरिद ऐनको दायराभित्र रहेर स्वदेशी उत्पादनलाई प्राथमिकता दिने व्यवस्था मिलाउन सबै सरकारी निकायलाई पुनःस्मरण गराइएको प्रवक्ता अर्यालले बताए।
‘स्वदेशी वस्तुको उत्पादन र प्रयोगलाई प्रोत्साहन गर्न स्थानीय सीप र उद्यमको संरक्षण, रोजगारी सिर्जना र आयात प्रतिस्थापन गर्ने उद्देश्यले सरकारी निकायमा हुने खरिद तथा प्रयोगमा नेपाली उत्पादनलाई प्राथमिकता दिन अति आवश्यक देखिएको छ,’ उनले भने।
सरकारी कार्यालयका बैठक, समारोह, कोसेली, उपहार, सजावट तथा अन्य प्रयोजनमा सम्भव भएसम्म नेपाली हस्तकला र नेपालमै उत्पादित वस्तु प्रयोग गर्न पत्राचार गरिएको उनले बताए।
स्वदेशी वस्तु तथा सेवाको उत्पादन र प्रयोग सरकारको प्राथमिकतामा रहेको समेत प्रवक्ता अर्यालले स्पष्ट पारे।