हङकङ विशेष प्रशासनिक क्षेत्रका प्रमुख कार्यकारी जोहन लीले बुधबार आफ्नो कार्यकालको पाँचौँ नीति सम्बोधन प्रस्तुत गर्दै आगामी पाँच वर्षका लागि विकास र सुधारको कार्ययोजना सार्वजनिक गरेका छन्।
‘उज्ज्वल नयाँ युगका लागि रणनीतिक दृष्टिकोण : सुधार अघि बढाउँदै विकासलाई गति दिने, अवसर सिर्जना गर्ने र जनजीवन सुधार गर्ने’ विषयमा केन्द्रित नीति सम्बोधनमा आर्थिक विकास, सुधार तथा जनजीवनसँग सम्बन्धित विभिन्न प्राथमिकता प्रस्तुत गरिएको छ।
लीका अनुसार पछिल्ला चार वर्षमा हङकङ सरकारले समुदायसँगको सहकार्यमा विभिन्न अन्तर्राष्ट्रिय सूचकांकमा उल्लेखनीय प्रगति हासिल गरेको छ। हङकङ विश्वकै स्वतन्त्र अर्थतन्त्रका रूपमा निरन्तर उच्च स्थानमा रहँदै आएको तथा विश्व प्रतिस्पर्धात्मकतामा दोस्रो, अन्तर्राष्ट्रिय वित्तीय केन्द्रका रूपमा तेस्रो र प्रतिभा प्रतिस्पर्धात्मकतामा चौथो स्थानमा पुगेको उनले बताए।
हङकङ अहिले स्थिरताबाट समृद्धितर्फ अघि बढ्ने महत्वपूर्ण मोडमा रहेको लीले उल्लेख गरे। उनका अनुसार आगामी पाँच वर्ष चीनको चिनियाँ शैलीको आधुनिकीकरणलाई अघि बढाउने महत्वपूर्ण अवधि हुनुका साथै हङकङका लागि उच्च गुणस्तरको विकास हासिल गर्ने सुनौलो अवसर पनि हो।
हङकङले पहिलोपटक तयार पारेको २०२६–२०३० को आर्थिक तथा सामाजिक विकाससम्बन्धी पाँचवर्षे योजनाले चीनको राष्ट्रिय १५औँ पाँचवर्षे योजनासँग सक्रिय रूपमा समन्वय गर्दै अघि बढ्ने मार्गचित्र तय गरेको लीले बताए।
उनका अनुसार प्रस्तुत नीति सम्बोधन हङकङको आफ्नै पाँचवर्षे योजनालाई कार्यान्वयनमा लैजान तयार गरिएको कार्ययोजना हो। यसमा बदलिँदो आर्थिक अवस्था र सम्भावनालाई ध्यानमा राख्दै राष्ट्रिय तथा अन्तर्राष्ट्रिय अवसरको सदुपयोग गर्न आवश्यक प्रमुख नीतिगत प्राथमिकता र ठूला परियोजनाहरू समेटिएका छन्।
लीले हङकङको पाँचवर्षे योजना र नीति सम्बोधन एकअर्कासँग गहिरो रूपमा जोडिएका र परस्पर पूरक दस्तावेज भएको बताए। यी दुवै योजनाले आगामी पाँच वर्षमा हङकङको आर्थिक तथा सामाजिक विकासलाई थप गति दिने लक्ष्य राखेको उनले बताए।