राष्ट्रपति रामचन्द्र पौडेलले भ्रष्टाचार नियन्त्रण तथा सुशासन प्रवर्द्धनका लागि अख्तियार दुरुपयोग अनुसन्धान आयोगले आफ्नो संवैधानिक र कानुनी दायित्व थप प्रभावकारी रूपमा निर्वाह गर्नुपर्ने बताएका छन्।
बिहीबार आयोगको आर्थिक वर्ष २०८२/८३ को वार्षिक प्रतिवेदन बुझ्दै राष्ट्रपति पौडेलले भ्रष्टाचारजन्य कसुरको पहिचान, अनुसन्धान र अभियोजनलाई वैज्ञानिक, विश्वसनीय, प्रविधिमैत्री तथा नतिजामुखी बनाउनुपर्नेमा जोड दिए।
सार्वजनिक निकाय तथा पदाधिकारीमा जवाफदेहिता, नैतिकता र सदाचार प्रवर्द्धन गर्न आयोगले महत्वपूर्ण योगदान पुर्याएको उनको भनाइ छ। उनले आयोगले आफ्नो कार्यगत स्वायत्तता कायम राख्दै निष्पक्षता र निर्भीकताका साथ काम गर्नुपर्ने बताए।
आयोगको प्रतिवेदनमा उल्लेख भएका भ्रष्टाचार नियन्त्रणसम्बन्धी प्रयास, उपलब्धि र सुझाव मुलुकमा सुशासन कायम गर्ने महत्वपूर्ण आधार बन्ने राष्ट्रपति पौडेलले बताए।
उनले भने, ‘आयोगले संवैधानिक र कानुनी दायित्व थप प्रभावकारी रूपमा पूरा गर्दै कार्यगत स्वायत्तता कायम राखी निष्पक्षता र निर्भीकताका साथ अघि बढ्नुपर्ने ठान्दछु। आयोगले आगामी दिनमा सक्षम, निष्पक्ष र प्रभावकारी ढंगबाट काम कारबाही गर्न सफलता मिलोस् भन्ने शुभकामना व्यक्त गर्दछु।’
राष्ट्रपति पौडेलले आयोगको प्रतिवेदनमा उल्लेख भएका भ्रष्टाचार नियन्त्रणसम्बन्धी प्रयास, उपलब्धि र सुझाव मुलुकमा सुशासन कायम गर्ने महत्वपूर्ण आधार बन्ने बताए।
प्रतिवेदन प्रधानमन्त्रीमार्फत संघीय संसदमा पेस हुने उल्लेख गर्दै उनले प्रतिवेदनमा उठाइएका विषयमाथि संघीय संसदमा गम्भीर छलफल हुने र नेपाल सरकारले प्रभावकारी रूपमा सम्बोधन गर्ने विश्वास व्यक्त गरे।
बिहीबार राष्ट्रपति भवन शीतल निवासमा आयोजित कार्यक्रममा अख्तियार दुरुपयोग अनुसन्धान आयोगका प्रमुख आयुक्त प्रेमकुमार राईले राष्ट्रपति पौडेलसमक्ष आर्थिक वर्ष २०८२/८३ को वार्षिक प्रतिवेदन पेस गरेका हुन्।