युद्धको विभीषिका खेपिरहेको गाजा पट्टीमा तीन वर्षको लामो अन्तरालपछि शनिबारदेखि प्रत्यक्ष कक्षा (इन–पर्सन लर्निङ) सुरु भएको छ। इजरायल–हमास द्वन्द्वका कारण थिलथिलो बनेको शैक्षिक क्षेत्रमा विद्यार्थीहरू भत्किएका संरचना वा अस्थायी टेन्टमा बसेर आफ्नो पढाइलाई निरन्तरता दिइरहेका छन्।
प्यालेस्टिनी शिक्षा तथा उच्च शिक्षा मन्त्रालयका अनुसार गाजामा करिब ५ लाख ४१ हजार विद्यार्थी शैक्षिक कार्यक्रममा सामेल भएका छन्। यसमध्ये करिब १ लाख विद्यार्थी संयुक्त राष्ट्रसंघीय निकायअन्तर्गतका विद्यालयमा अध्ययनरत छन्।
शनिबारदेखि न्युसेरात शिविर र गाजा सहरका केही सरकारी विद्यालयबाट सुरु भएको यो अभ्यास अब अन्य अस्थायी सिकाइ केन्द्रहरूमा विस्तार गर्ने योजना छ। द्वन्द्वका कारण विद्यालयका भवनहरू विस्थापितहरूको आश्रयस्थल बनेका छन्, जसका कारण पढाइ सञ्चालनका लागि टेन्ट र अस्थायी संरचनाहरूको सहारा लिनुपरेको छ।
स्थानीय शिक्षक मोहम्मद तानिराले भने, ‘कठिन परिस्थिति भए पनि शिक्षाप्रतिको मोह र भविष्यको आशाका कारण हामी युद्धका बीच पनि शैक्षिक प्रक्रियालाई निरन्तरता दिइरहेका छौँ।’
तथ्यांकअनुसार सन् २०२३ को अक्टोबरयता जारी युद्धमा २० हजारभन्दा बढी विद्यार्थीको मृत्यु भइसकेको छ भने ६ लाख २० हजारभन्दा बढी विद्यार्थी नियमित पठनपाठनबाट वञ्चित रहँदै आएका छन्। मन्त्रालयले अहिले प्रत्यक्ष कक्षा र भौतिक उपस्थिति सम्भव नहुने विद्यार्थीका लागि भर्चुअल कक्षाको व्यवस्था गरेको छ।
यद्यपि, शिक्षा क्षेत्रमा स्रोतसाधनको चरम अभाव छ। सन् २०२२–२३ मा २ सय दिन रहेको शैक्षिक वर्ष घटेर ६० दिनमा सीमित भएको छ भने साप्ताहिक कक्षा पनि ३० बाट घटेर १२ मा झरेको छ। शिक्षा मन्त्रालयले भविष्यमा थप २५ वटा अस्थायी विद्यालय भवन निर्माण गर्ने तयारी गरिरहेको छ।
पूर्वाधार र सामग्रीको अभावका बाबजुद गत वर्षको तुलनामा यस वर्ष भर्ना दरमा भएको वृद्धिले गाजाका अभिभावक र विद्यार्थीको शिक्षाप्रतिको दृढतालाई उजागर गरेको छ।