काठमाडौं । आगामी केही दिन देशभरका नदी तथा खोलामा पानीको बहाव बढ्ने सम्भावना रहेको भन्दै जल तथा मौसम विज्ञान विभागले उच्च सतर्कता अपनाउन आग्रह गरेको छ। विभागअन्तर्गतको बाढी पूर्वानुमान शाखाका अनुसार प्रमुख नदीसँगै साना खोलामा समेत आकस्मिक बाढीको जोखिम बढ्न सक्नेछ।
असोज ८ देखि १२ गतेसम्मको पूर्वानुमानअनुसार कोशी, नारायणी, कर्णाली, महाकालीलगायतका जलाधार क्षेत्रमा विभिन्न दिनमा जलसतह बढ्ने सम्भावना छ।
कर्णाली क्षेत्रमा उच्च जोखिम
कर्णाली जलाधारमा आगामी दिनमा बाढीको जोखिम बढ्ने पूर्वानुमान गरिएको छ। कर्णाली चिसापानीमा शनिबार र आइतबार उच्च जोखिमको अवस्था आउन सक्ने बताइएको छ।
ठूलीभेरीको रिम्ना क्षेत्रमा पनि शनिबार र आइतबार बाढीको उच्च जोखिम रहेको विभागले जनाएको छ। पश्चिम सेती तथा कर्णालीको असाराघाट क्षेत्रमा शुक्रबार मध्यम जोखिम रहने अनुमान गरिएको छ।
महाकाली नदीमा भने शनिबार र आइतबार जलसतह बढेर मध्यम जोखिममा पुग्न सक्ने पूर्वानुमान छ।
नारायणी क्षेत्रमा पनि सतर्कता आवश्यक
नारायणी जलाधारअन्तर्गत देवघाटमा बिहीबार सामान्य रहेको जलसतह शुक्रबारदेखि आइतबारसम्म मध्यम जोखिममा पुग्न सक्ने विभागको अनुमान छ।
त्रिशूली, बूढीगण्डकी, मर्स्याङ्दी, सेती र बडिगाडलगायतका नदीमा पनि शुक्रबार र शनिबार बाढीको जोखिम मध्यम रहने बताइएको छ।
विशेषगरी बडिगाड–रुद्रबेनी र कालीगण्डकी–कुमालगाउँ क्षेत्र शनिबार उच्च जोखिममा पर्न सक्ने भएकाले उक्त मार्गमा यात्रा गर्नेहरूलाई विशेष सावधानी अपनाउन आग्रह गरिएको छ।
कोशी क्षेत्रमा पनि जलसतह बढ्ने
कोशी जलाधारअन्तर्गत सप्तकोशीको चतरामा पाँच दिनसम्म पानीको बहाव उल्लेख्य रूपमा बढ्न सक्ने पूर्वानुमान गरिएको छ।
शुक्रबार र शनिबार चतरामा जोखिम मध्यम तहमा पुग्न सक्ने भए पनि तमोर, अरुण, दूधकोशी, तामाकोशी र सुनकोशीमा जलसतह बढे पनि जोखिम सामान्य रहने अनुमान छ।
बागमती तथा पूर्वी राप्ती नदीमा शुक्रबार मध्यम जोखिम देखिएको छ। पूर्वी राप्तीमा शनिबारदेखि सोमबारसम्म पानीको बहाव उल्लेख्य रूपमा बढ्न सक्ने विभागले जनाएको छ।
पश्चिम नेपालका साना खोलामा आकस्मिक बाढीको जोखिम
प्रमुख नदीसँगै साना खोलामा पनि अचानक बाढी आउन सक्ने सम्भावना रहेको विभागले जनाएको छ।
बिहीबार बिहानदेखि शुक्रबार बिहानसम्म कोशी, मधेस, बागमती र गण्डकी प्रदेशका विभिन्न साना खोलामा मध्यम जोखिम रहेको बताइएको छ। पाल्पा, गुल्मी, अर्घाखाँची, कपिलवस्तु, प्युठान र दाङका केही साना खोलामा भने उच्च जोखिमको चेतावनी जारी गरिएको छ।
त्यसपछि गुल्मी, पर्वत, बागलुङ, प्युठान, दाङ, रोल्पा, रुकुम पूर्व, रुकुम पश्चिम, जाजरकोट, सल्यान, बाँके, बर्दिया, सुर्खेत र दैलेखका साना खोलामा आकस्मिक बाढीको जोखिम उच्च रहने अनुमान गरिएको छ।
तटीय क्षेत्र र यात्रुहरूलाई सावधानी
विभागले नदी तथा खोला किनारमा बसोबास गर्ने नागरिकलाई जलसतह बढ्न सक्ने अवस्थालाई ध्यानमा राख्दै आवश्यक सावधानी अपनाउन आग्रह गरेको छ।
बाढीको सम्भावना भएका क्षेत्रमा यात्रा गर्दा सडक तथा मौसमको अवस्था बुझेर मात्र अघि बढ्न र जोखिमपूर्ण खोला तथा नदी पार गर्ने काम नगर्न सुझाव दिइएको छ।
बाढीसम्बन्धी सूचना कहाँबाट लिने ?
बाढीको अवस्था र पूर्वानुमानबारे नियमित जानकारी लिन जल तथा मौसम विज्ञान विभागले उपलब्ध गराएका आधिकारिक माध्यम प्रयोग गर्न सकिन्छ।
विभागले हरेक बिहान बाढीसम्बन्धी बुलेटिन सार्वजनिक गर्ने जनाएको छ। त्यस्तै, बाढीसम्बन्धी अद्यावधिक जानकारीका लागि सरकारी टोल–फ्री नम्बर ११५५ मा समेत सम्पर्क गर्न सकिने व्यवस्था रहेको छ।