११ असोज ,काठमाडौं — पूर्वप्रधानन्यायाधीश चोलेन्द्रशमशेर जबरालाई प्रहरीले परिवारको जिम्मा लगाएको छ। उनलाई शनिबार राति महाराजगञ्जस्थित निवासबाट प्रहरीले नियन्त्रणमा लिएको थियो।
अपराध अनुसन्धान कार्यालयका एसपी रामेश्वर कार्कीका अनुसार जबरालाई केही समयअघि परिवारको जिम्मा लगाइएको हो। यसअघि कार्यालयका एसएसपी सन्तोष खड्काले उनलाई सुरक्षाका कारण सुरक्षित स्थानमा राखिएको बताएका थिए।
जबरालाई किन पक्राउ गरिएको हो भन्नेबारे सरकारले औपचारिक रूपमा स्पष्ट कारण सार्वजनिक गरेको छैन। एसएसपी खड्काले भने सुरक्षा चुनौतीका कारण उनलाई रातारात कार्यालयमा ल्याइएको दाबी गरेका छन्।
प्रहरीले जबरालाई नियन्त्रणमा लिएपछि उनलाई भेट्न राष्ट्रिय मानव अधिकार आयोगको टोली अपराध अनुसन्धान कार्यालय पुगेको थियो। तर प्रहरीबाट भेट्ने अनुमति नपाएपछि आयोगको टोली करिब ४५ मिनेट गेटमा बसेर फर्किएको बताइएको छ।
जबराका भाइ प्रभुशम्शेरका अनुसार प्रहरीले ‘जेनजी’ समूहबाट सुरक्षा खतरा रहेको भन्दै उनलाई नियन्त्रणमा लिएको जानकारी गराएको थियो।
घटनापछि कानुनका जानकारहरूले भने पक्राउ गर्ने प्रहरीको प्रक्रिया र त्यसका आधारबारे प्रश्न उठाएका छन्। जबरालाई पक्राउ गर्नुअघि तथा पक्राउपछि अपनाइएको कानुनी प्रक्रियाबारे थप स्पष्टता आवश्यक रहेको उनीहरूको भनाइ छ।
घटनासम्बन्धी थप आधिकारिक विवरण भने सार्वजनिक हुन बाँकी छ।