काठमाडौं । नेपाली कांग्रेसले आफ्नो १५औँ महाधिवेशनको उद्घाटन समारोहमा सहभागी हुन विभिन्न देशका राजनीतिक दल तथा अन्तर्राष्ट्रिय राजनीतिक संस्थालाई निमन्त्रणा पठाएको जनाएको छ।
काठमाडौंमा असोज १६ गतेदेखि सुरु हुने महाधिवेशनको उद्घाटन कार्यक्रममा छिमेकी मुलुक भारत र चीनसहित अमेरिका, बेलायत, जर्मनी तथा बंगलादेशका राजनीतिक दललाई आमन्त्रण गरिएको कांग्रेसका नेताहरूले बताएका छन्।
कांग्रेसका अनुसार भारतबाट सत्तारुढ भारतीय जनता पार्टी (भाजपा) र प्रमुख प्रतिपक्षी दल कांग्रेस आईलाई निमन्त्रणा पठाइएको छ। चीनको सत्तारुढ चिनियाँ कम्युनिस्ट पार्टीलाई पनि उद्घाटन समारोहमा सहभागी हुन आमन्त्रण गरिएको बताइएको छ।
त्यसैगरी अमेरिकाका रिपब्लिकन पार्टी र डेमोक्रेटिक पार्टीलाई पनि निमन्त्रणा गरिएको छ। बेलायतका सत्तारुढ लेबर पार्टी तथा प्रमुख प्रतिपक्षी कन्जरभेटिभ पार्टीलाई समेत कार्यक्रममा सहभागी हुन आमन्त्रण गरिएको छ।
जर्मनीको सत्तारुढ सोसल डेमोक्रेटिक पार्टी र बंगलादेशको सत्तारुढ बंगलादेश नेसनलिस्ट पार्टी (बीएनपी) लाई पनि निमन्त्रणापत्र पठाइएको कांग्रेसका एक नेताले जानकारी दिएका छन्।
कांग्रेसले युरोपका विभिन्न लोकतान्त्रिक समाजवादी दल, सोसलिस्ट इन्टरनेसनल तथा इन्टरनेसनल कन्फ्रेन्स फर एसियन पोलिटिकल पार्टीज (आईसीएपीपी) लाई समेत महाधिवेशनमा सहभागी हुन निमन्त्रणा गरेको जनाएको छ।
विदेशी पाहुनाको सहभागिताका विषयमा भने हालसम्म सबै पक्षबाट अन्तिम पुष्टि प्राप्त नभएको कांग्रेसका नेताहरूले बताएका छन्। छोटो समयमै निमन्त्रणा पठाइएको र मौसमसम्बन्धी प्रतिकूलताका कारण विदेशी प्रतिनिधिको उपस्थितिमा प्रभाव पर्न सक्ने अनुमानसमेत गरिएको छ।
कांग्रेसका कार्यवाहक मुख्यसचिव कृष्ण दुलालले पार्टीले विगतका महाधिवेशनमा निमन्त्रणा गर्दै आएका विदेशी पाहुना तथा राजनीतिक दललाई यसपटक पनि निरन्तरता दिँदै आमन्त्रण गरिएको बताए।
उनका अनुसार विभिन्न मुलुक तथा राजनीतिक संस्थालाई निमन्त्रणापत्र पठाइसकिए पनि उनीहरूको सहभागिताबारे औपचारिक पुष्टि आउन बाँकी छ।