हुम्ला र मुगुबाट जडीबुटी संकलनका लागि हिमाली भेगतर्फ गएका १२ जना लामो समयदेखि परिवार तथा स्थानीय प्रशासनको सम्पर्कमा आउन सकेका छैनन् । सम्पर्कविहीन हुनेमा हुम्लाका १० र मुगुका २ जना रहेका छन् ।
उच्च हिमाली क्षेत्रमा निरन्तर हिमपात र प्रतिकूल मौसमका कारण खोज तथा उद्धारका लागि स्थलमार्ग प्रयोग गर्न कठिन भएको छ । त्यसपछि जिल्ला सुरक्षा समितिले नेपाली सेनाको हेलिकोप्टर प्रयोग गरी उनीहरूको खोजी तथा उद्धार गर्न आवश्यक पहल अघि बढाएको छ ।
प्रहरीका अनुसार सिमकोट गाउँपालिका–२ ठेहेका धनमानसिंह बोहरा, पिजली बोहरा, पुन बोहरा, गोरसिंह भण्डारी, धनपुरी बोहरा, पलिवन बोहरा, जुन बोहरा, नर भण्डारी, खिम भण्डारी र लक्ष्मी बोहरा सम्पर्कविहीन छन् ।
उनीहरू सिमकोट गाउँपालिका–१ को दोजाम हुँदै खार्पुनाथ गाउँपालिकाको त्रिशूली लुरुपे सामुदायिक वन र चंखेली गाउँपालिकाको सीमाक्षेत्रमा पर्ने उच्च हिमाली भूभागमा जडीबुटी संकलन गर्न पुगेका थिए ।
लगातारको वर्षा र हिमपातका कारण उक्त क्षेत्रमा पैदल पुगेर खोजी तथा उद्धार गर्न तत्काल सम्भव नदेखिएपछि जिल्ला सुरक्षा समितिको बैठकले हवाई माध्यमबाट उद्धारको विकल्प अघि सारेको हो ।
जिल्ला प्रहरी कार्यालय हुम्लाका प्रमुख डीएसपी शंकर भण्डारीका अनुसार सम्पर्कविहीन व्यक्तिहरूको खोजी भइरहेको छ । उच्च क्षेत्रमा जारी हिमपातले उद्धार टोलीको आवतजावतमा समस्या भइरहेको उनले बताए ।
यसैबीच सम्पर्कविहीनमध्येका आफन्त रवामसिंह भण्डारीले पनि नेपाली सेनाको हेलिकोप्टर परिचालन गरी तत्काल खोजी तथा उद्धार गर्न माग गरेका छन् । स्थलमार्गबाट उद्धार गर्न कठिन अवस्था रहेकाले हवाई माध्यम प्रयोग गर्न सम्बन्धित निकायलाई आग्रह गरिएको उनले बताए ।