काठमाडौं, १९ असोज । साताको पहिलो कारोबार दिन सोमबार सेयर बजार राताम्मै भएको छ। केही दिनदेखि सेयर बजारमा गएको पहिरो थामिएको छैन।
नेपाल स्टक एक्सचेन्ज (नेप्से) परिसूचक २०.४८ अंक घटेर २५६६.७६ विन्दुमा झरेको छ। सेन्सेटिभ इन्डेक्स ३.२३ अंक, फ्लोट इन्डेक्स १.४७ अंक र सेन्सेटिभ फ्लोट इन्डेक्स १.१३ अंक घटेको छ।
१३ मध्ये एक उपसमूहको परिसूचक मात्र बढेको छ। व्यापार उपसमूहको परिसूचक सामान्य अंकले बढेको छ। कारोबारमा आएका वित्त उपसमूहको परिसूचक १.१० प्रतिशत घटेको छ। होटल तथा पर्यटन, जलविद्युत् र लगानी उपसमूहको परिसूचक १ प्रतिशतभन्दा बढी घटेको छ।
आज नेप्सेसँगै कारोबार रकम पनि घटेको छ। शुक्रबार चार अर्ब २९ करोड रुपैयाँबराबरको सेयर खरिदबिक्री भएको थियो। आज ३५९ स्टकको ४४ हजार ७७७ पटकको कारोबारमा तीन अर्ब २७ करोड ९५ लाख ९ हजार रुपैयाँबराबरको कारोबार भएको छ।
सोमबार घलेम्दी हाइड्रो कम्पनीको २२ करोड ८६ लाख रुपैयाँबराबरको सेयर कारोबार भएको छ। हाथवे इन्भेष्टमेन्टको आठ करोड ४९ लाख रुपैयाँ र शिवम् सिमेन्ट्सको कारोबार रकम ८ करोड ४३ लाख रुपैयाँ नाघेको छ।
आज शीर्ष १० स्टकमा अधिकांश ऋणपत्र रहेका छन्। १०.३० प्रतिशत स्ट्यान्डर्ड चार्टर्ड बैंक लिमिटेड डिबेञ्चरको मूल्य ५.७५ प्रतिशत, १० प्रतिशत नेपाल एसबीआई बैंक डिबेञ्चर २०८६ र ग्लोबल आइएमई समुन्नत योजना–२ को मूल्य करिब ५ प्रतिशत बढेको छ।