काठमाडौँ, २० असोज । नेपाली कांग्रेसको १५औँ महाधिवेशनअन्तर्गत आज तेस्रो दिन बन्दसत्र जारी छ । हिजोदेखि सुरु भएको बन्दसत्रमा सभापति गगनकुमार थापा, उपसभापति विश्वप्रकाश शर्मा, महामन्त्री गुरुराज घिमिरे र कोषाध्यक्ष उमेश श्रेष्ठको प्रतिवेदन पारित हुन बाँकी छ ।
हिजो महामन्त्री प्रदीप पौडेलको संशोधित विधान पारित भएको थियो । सोहीअनुसार निर्वाचन प्रक्रिया अगाडि बढेको छ । निर्वाचनका लागि उम्मेदवारी दर्ता कार्यक्रम राष्ट्रिय सभा गृहमा चलिरहँदा खुलामञ्चमा बन्दसत्र भइरहेको हो ।
आकर्षण निर्वाचनतर्फ भइरहँदा खुलामञ्चमा चहलपहल कम छ । महाधिवेशन व्यवस्थापन समितिका संयोजक सुरेशराज आचार्यले बन्दसत्र सुरु गरिएको जानकारी दिएका छन् । उनले तीनवटा हलमा आ–आफ्नो क्लस्टरका महाधिवेशन प्रतिनिधिबीच प्रतिवेदन प्रस्तुत भएकामा आज सुरुवातमा छुट्टाछुट्टै छलफल भए पनि महाधिवेशन प्रतिनिधि कम उपस्थित भएमा एउटै हलमा समेटेर छलफल चलाइ पारित गर्ने योजना बनाइएको बताएका छन् ।
संयोजक आचार्यले भने, ‘सभापति गगन थापाले पेस गरेको प्रतिवेदन, उपसभापति विश्वप्रकाश शर्मा, महामन्त्री गुरुराज घिमिरे र कोषाध्यक्ष उमेश श्रेष्ठको प्रतिवेदनमाथि छलफल हुन्छ । त्यसपछि पारित हुन्छ ।’