काठमाडौं । राष्ट्रिय विपद् जोखिम न्यूनीकरण तथा व्यवस्थापन प्राधिकरणले रसुवाको भोटेकोशी र त्रिशूली नदी किनारका बस्ती तथा त्यहाँ खटिएका उद्धारकर्मीलाई उच्च सतर्कता अपनाउन आग्रह गरेको छ।
भदौ १० गते ठूलो बाढी आएको भोटेकोशी नदी क्षेत्रमा शुक्रबार पुनः लेदोसहित पानीको बहाव बढ्न थालेपछि थप बाढी आउन सक्ने जोखिम देखिएको भन्दै प्राधिकरणले सतर्कता अपनाउन सूचना जारी गरेको हो।
प्राधिकरणका प्रवक्ता एवं उपसचिव शान्ति महतद्वारा जारी विज्ञप्तिमा भोटेकोशी तथा त्रिशूली नदी किनारमा उद्धार र राहत कार्यमा खटिएका तथा विभिन्न कारणले जोखिम क्षेत्रमा रहेका सबैलाई विशेष सावधानी अपनाउन आग्रह गरिएको छ।
प्राधिकरणले जोखिमको अवस्था देखिएमा तत्काल सुरक्षित स्थानतर्फ जानसमेत अनुरोध गरेको छ। नदीमा लेदोसहितको पानीको बहाव बढ्ने क्रम जारी रहेकाले तल्लो तटीय क्षेत्रमा थप जोखिम हुनसक्ने भन्दै आवश्यक सुरक्षा उपाय अपनाउन प्राधिकरणले जोड दिएको छ।
विपद्को प्रतिकूल अवस्थामा सहयोग तथा आवश्यक जानकारीका लागि प्राधिकरणले टोल फ्री नम्बर ११४९ समेत सञ्चालनमा ल्याएको जनाएको छ।