नेपालीहरूको महान् पर्व बडादशैँ आज आइतबार घटस्थापनासँगै देशभर सुरु भएको छ।
मिथिलाको सांस्कृतिक केन्द्र जनकपुरधामस्थित प्रमुख शक्तिपीठहरूमा बिहानैदेखि भक्तजनको घुइँचो लागेको छ। तान्त्रिक विधिअनुसार घटस्थापना गरी नवरात्रिको पूजा आरम्भ गरिएको छ।
दशैँको पहिलो दिन जनकपुरधामस्थित ऐतिहासिक राजदेवी मन्दिर, बौधी माई मन्दिर, विद्यापति चोकस्थित दुर्गा मन्दिर र रामानन्द चोकको दुर्गा मन्दिरलाई विशेष रूपमा सजाइएको छ। मन्दिर परिसरमा बिहानैदेखि श्रद्धालुहरू पूजाआजा र दर्शनका लागि पुगिरहेका छन्।
राजदेवी मन्दिरमा शारदीय नवरात्रका अवसरमा घटस्थापनादेखि महानवमीसम्म विशेष पूजाआजा गर्ने परम्परा छ। मन्दिरका पुजारीहरूका अनुसार तान्त्रिक विधिअनुसार आज बिहान शुभ साइतमा गणेश कलश, भैरव कलश र दुर्गा कलश स्थापना गरिएको छ। त्यससँगै माता दुर्गाको आह्वान गर्दै वैदिक मन्त्रोच्चारणसहित पूजा सुरु गरिएको छ।
जनकपुरधामका शक्तिपीठहरूमा दशैँका अवसरमा हुने विशेष पूजामा सहभागी हुन टाढाटाढाबाट भक्तजन आउने गर्छन्। भक्तजनको भीडलाई ध्यानमा राख्दै सुरक्षा तथा दर्शनको आवश्यक व्यवस्था मिलाइएको मन्दिर व्यवस्थापन समितिले जनाएको छ।
नवरात्रका नौ दिनसम्म देवीका विभिन्न स्वरूपको आराधना गरिने भएकाले जनकपुरधामका मन्दिरहरूमा धार्मिक चहलपहल बढेको छ।