काठमाडौं, २५ असोज । म्यानचेस्टर सिटीको आर्थिक मामिलामा प्रिमियर लिगको छानबिन प्रक्रिया अघि बढाउन मद्दत पुर्याउने ‘फुटबल लिक्स’ वेबसाइटका सञ्चालक तथा कम्प्युटर ह्याकर रुई पिन्टो प्रहरीको सुरक्षा घेरामा नै रहने पोर्चुगिज अधिकारीहरूले पुष्टि गरेका छन्।
पिन्टले सन् २००९ देखि २०१८ सम्म सिटीले लिगका नियमहरू उल्लङ्घन गरेको देखाउने गोप्य कागजातहरू हात पारेका थिए। प्रिमियर लिगका आर्थिक नियमहरूको उल्लङ्घन गरेको आरोपमा सिटीविरुद्ध लगाइएका ११५ वटा अभियोगमध्ये एउटाबाहेक अन्य सबैमा एक स्वतन्त्र आयोगले क्लबलाई दोषी ठहर गरेको छ।
न्याय मन्त्रालयले जारी गरेको विज्ञप्तिअनुसार शनिबार (अक्टोबर १०) मा समाप्त हुने भनिएको उनको साक्षी सुरक्षासम्बन्धी उपाय अब अर्को निर्णय नभएसम्म यथावत रहनेछ।
गत शुक्रबार जारी विज्ञप्तिमा उल्लेख भए अनुसार यसअघिको निर्णय खारेज गरिएको थियो; किनकि पिन्टोलाई “निर्णयको कारणबारे विधिवत् जानकारी दिइएको थिएन” र उनले त्यस निर्णयलाई चुनौती दिने अवसरसमेत पाएका थिएनन्।
पिन्टोका वकिलहरूले गत साता कानुनी प्रक्रियामा देखिएका अनियमितताहरूको आलोचना गर्दै आफ्ना क्लाइन्टले सामना गरिरहेका वास्तविक खतराहरूबारे ध्यानाकर्षण गराएका थिए। पिन्टोमाथि गत अप्रिलमा लिस्बनमा आक्रमण भएको थियो। ३७ वर्षीय पिन्टोले आफूलाई पटक-पटक ज्यान मार्ने धम्की आएका कारण गोप्य स्थानमा सर्नुपरेको बताएका छन्।
सन् २०१९ को जनवरीमा हंगेरीमा बस्दै गर्दा पक्राउ परी पोर्चुगल सुपुर्दगी गरिएका पिन्टोले आफूसँग भएका ‘इन्क्रिप्टेड’ (कूटलेखन गरिएका) तथ्याङ्कमा अधिकारीहरूको पहुँच दिन सहयोग गर्न सहमत हुनु अघि एक वर्षभन्दा बढी समय पुर्पक्षका लागि थुनामा बिताएका थिए।
पक्राउ पर्नुअघि आफूले जम्मा गरेका लाखौं फाइलहरूको पहुँच पोर्चुगलका अधिकारीहरूलाई दिन सहमत भएपछि पिन्टो सन् २०२० देखि ‘संरक्षित साक्षी’ का रूपमा रहँदै आएका छन्। पिन्टो पोर्चुगिज न्याय प्रणालीमा प्रतिवादी र संरक्षित साक्षी दुवै हुन्। उनी अन्य युरोपेली देशका अनुसन्धानकर्ताहरूसँग पनि सहकार्य गरिरहेका छन्।
आफ्नो पहिलो सुनुवाइको क्रममा इतिहास विषयका पूर्वविद्यार्थी तथा स्व-अध्ययनबाट कम्प्युटर विशेषज्ञ बनेका पिन्टोले लाखौं कागजात प्राप्त गर्न कम्प्युटर ह्याक गरेको स्वीकार गरे। उनले ती कागजातहरू सन् २०१५ को अन्त्यतिर अनलाइनमा सार्वजनिक गर्न थालेका थिए।
युरोपेली अनुसन्धानमूलक सञ्चारमाध्यमहरूको समूहलाई उपलब्ध गराइएको यस विशाल सूचना-भण्डारले चर्चित फुटबल खेलाडी, क्लब र एजेन्टहरूसँग जोडिएका शंकास्पद गतिविधिहरू उजागर गर्यो, जसका कारण पछि विभिन्न देशहरूमा करसम्बन्धी समायोजन र न्यायिक अनुसन्धानहरू भए।
सन् २०२३ को सेप्टेम्बरमा, जबरजस्ती असुलीको प्रयास, तथ्याङ्कमा अवैध पहुँच र पत्राचारको गोपनीयता उल्लङ्घन गरेको अभियोगमा दोषी ठहर भएपछि पोर्चुगलको एक अदालतले पिन्टोलाई चार वर्षको निलम्बित सजाय सुनायो।