सुर्खेत, २५ असोज । कर्णाली प्रदेश योजना आयोगको उपाध्यक्षमा जुम्ला घर भएका डा. भीमबहादुर खत्री नियुक्त भएका छन्। साउन महिनादेखि रिक्त रहेको उपाध्यक्ष पदमा उनी नियुक्त भएका हुन्।
उनलाई आज एक कार्यक्रमबीच मुख्यमन्त्री मंगलबहादुर शाहीले उपाध्यक्ष पदको शपथ ग्रहण गराएका छन्।
शुक्रबार बसेको मन्त्रिपरिषद् बैठकले जुम्लाको तातोपानी गाउँपालिका–४ का खत्रीलाई नियुक्त गर्ने निर्णय गरेको थियो।
बागवानीविद् तथा प्राध्यापकसमेत रहेका डा. खत्री विशेषगरी नेपालमा आलुबालीको अनुसन्धान, प्रविधि विकास, मूल बीउ उत्पादन प्रणालीको स्थापना तथा बागवानी क्षेत्रमा चार दशकदेखि सक्रिय छन्।
उनी त्रिभुवन विश्वविद्यालयमा बागवानी विषयको प्राध्यापन तथा विद्यावारिधि तहका शोधार्थीहरूको प्राज्ञिक निर्देशकका रूपमा समेत सक्रिय छन्। वि.सं. २०१४ फागुन ३ मा जन्मिएका खत्रीले अस्ट्रेलियाको तस्मानिया विश्वविद्यालयअन्तर्गत कृषि विज्ञान अध्ययन संस्थानबाट कृषिमा विद्यावारिधि गरेका हुन्।
फिलिपिन्सको बेङ्गेट स्टेट विश्वविद्यालयबाट सन् १९९३–१९९५ मा कृषि (बागवानी)मा स्नातकोत्तर गरेका उनले स्नातक भने त्रिभुवन विश्वविद्यालय, कृषि तथा पशु विज्ञान अध्ययन संस्थान, रामपुर क्याम्पस, चितवनबाट सन् १९७९–१९८२ मा गरेका हुन्। डा. खत्री सन् २०२१ देखि हालसम्म बागवानी विषयका प्राध्यापक छन्।
त्रिभुवन विश्वविद्यालय, कृषि तथा पशु विज्ञान अध्ययन संस्थान, कीर्तिपुरमा स्नातकोत्तर तहका विद्यार्थीहरूलाई अध्यापन गराउँदै आएका उनी त्रिभुवन विश्वविद्यालय र कृषि तथा वन विज्ञान विश्वविद्यालय (चितवन)का स्नातकोत्तर तथा विद्यावारिधि तहका शोधार्थीहरूको मुख्य सल्लाहकार र शोध निर्देशकका रूपमा कार्यरत छन्।