२७ असोज, बनेपा (काभ्रे) । सार्वजनिक बिदाका दिन सरकारी सवारीसाधन दुरुपयोग गरी सार्वजनिक स्थानमा सर्वसाधारणमाथि अभद्र व्यवहार गरेको आरोपमा काभ्रेपलाञ्चोकको पनौती नगरपालिका–३, कुशादेवीका ४० वर्षीय गणेश सापकोटा पक्राउ परेका छन्।
गत असोज २४ गते शनिबार भएको घटनासम्बन्धी भिडियो सामाजिक सञ्जालमा सार्वजनिक भएपछि प्रहरीले अनुसन्धान अघि बढाएको थियो। जिल्ला प्रहरी कार्यालय काभ्रेपलाञ्चोकका सूचना अधिकारी रबिन विष्टका अनुसार उक्त भिडियोका आधारमा प्रहरीले असोज २५ गते सापकोटालाई पक्राउ गरी जिल्ला प्रशासन कार्यालयमा उपस्थित गराएको थियो।
प्रहरीले जिल्ला प्रशासन कार्यालयबाट तीन दिनको म्याद थप अनुमति लिएर सापकोटालाई इलाका प्रहरी कार्यालय बनेपाको हिरासतमा राखेको छ। उनीमाथि अभद्र व्यवहारसम्बन्धी कसुरमा थप अनुसन्धान भइरहेको सूचना अधिकारी विष्टले जानकारी दिए।
प्रहरीका अनुसार अनुसन्धानपछि सापकोटाविरुद्ध अभद्र व्यवहारसम्बन्धी कसुरमा कानुनी कारबाही प्रक्रिया अघि बढाइनेछ।