काठमाडौं । नेकपा (एमाले) अध्यक्ष एवं पूर्वप्रधानमन्त्री केपी शर्मा ओलीले जलवायु परिवर्तनका कारण हुने विपद्बाट नेपालजस्ता विकासशील तथा जोखिममा रहेका मुलुकले भोग्नुपरेको क्षतिको क्षतिपूर्ति विकसित मुलुकले व्यहोर्नुपर्ने बताएका छन्।
सोमबार पार्टी केन्द्रीय कार्यालय च्यासलमा एमाले राजधानी प्रदेश कमिटीले बाढीपीडितका लागि हस्तान्तरण गरेको १० लाख रुपैयाँको चेक ग्रहण गर्दै अध्यक्ष ओलीले जलवायुजन्य तथा पर्वतीय विपद्का लागि नेपालजस्ता मुलुक जिम्मेवार नरहेको धारणा राखेका हुन्।
रसुवा बाढीजस्तै मानवीय कारणबाट उत्पन्न हुने पर्वतीय तथा अन्य विपद्मा नेपालको कुनै योगदान नरहेको दाबी गर्दै ओलीले वातावरण विनाशमा बढी योगदान गर्ने विकसित देशहरूले त्यसबाट उत्पन्न क्षतिको जिम्मेवारी लिनुपर्ने बताए।
आफूले संयुक्त राष्ट्रसंघमा समेत जलवायुजन्य क्षति र त्यसको क्षतिपूर्तिको विषय उठाएको स्मरण गर्दै ओलीले यस विषयमा अन्तर्राष्ट्रिय समुदायको पर्याप्त ध्यान जान नसकेको टिप्पणी गरे।
रसुवा बाढीपछि अन्तर्राष्ट्रिय समुदायबाट नेपालले प्राप्त गरिरहेको सहयोगप्रति धन्यवाद व्यक्त गर्दै उनले जलवायु क्षतिपूर्तिको विषयलाई समेत प्राथमिकताका साथ अन्तर्राष्ट्रियस्तरमा उठाउनुपर्नेमा जोड दिए।
कार्बन उत्सर्जन न्यूनीकरणमा योगदान गर्ने तर कार्बन उत्सर्जनमा न्यून योगदान भएका देशहरूले जलवायुजन्य क्षतिको भार व्यहोर्नुपरेको उल्लेख गर्दै ओलीले कार्बन ट्रेडको अवधारणालाई न्यायको अंगका रूपमा स्थापित गर्नुपर्ने धारणा राखे।
नेपालले जलवायुजन्य क्षतिपूर्तिमा आफ्नो दाबी प्रस्तुत गर्नुपर्ने उल्लेख गर्दै उनले विकसित मुलुकले वातावरण विनाशमा गरेको योगदानका आधारमा जोखिममा रहेका तथा कार्बन उत्सर्जन न्यूनीकरणमा योगदान गर्ने मुलुकलाई क्षतिपूर्ति उपलब्ध गराउनुपर्ने बताए।
रसुवा बाढीलाई तत्कालको विपद्का रूपमा मात्र नहेरी भविष्यमा अझ ठूलो खतरा आउन सक्ने संकेतका रूपमा बुझ्नुपर्ने ओलीको धारणा छ। उनले यस्ता पर्वतीय तथा जलवायुजन्य विपद्बाट हुने क्षति न्यूनीकरणका लागि दीर्घकालीन रणनीति आवश्यक रहेकोमा जोड दिए।