काठमाडौं । नेपालमा आएको भीषण बाढीको प्रभाव भारतको सीमावर्ती क्षेत्रमा समेत देखिन थालेको छ। उत्तर प्रदेशका महराजगञ्जमा गण्डक (नारायणी) नदीबाट चार तथा कुशीनगरमा तीन गरी सात शव फेला परेका छन्।
अधिकारीहरूका अनुसार फेला परेका शवमध्ये पाँच महिला र दुई पुरुष रहेका छन्। नेपालमा आएको बाढीका क्रममा नदीमा बगेका शव तीव्र बहावसँगै भारततर्फ पुगेको हुनसक्ने आशंका गरिएको छ।
सशस्त्र सीमा बल (एसएसबी) को उद्धार टोलीले नदीमा निगरानी गर्ने क्रममा शवहरू बगिरहेको अवस्थामा देखेपछि मोटरबोटको सहयोगमा नदीबाट बाहिर निकालेको हो। त्यसपछि शवहरू महराजगञ्ज र कुशीनगर जिल्ला मुख्यालय पठाइएको छ। हालसम्म कुनै पनि शवको पहिचान हुन सकेको छैन।
निचलौल तहसीलका उपजिलाधिकारी सिद्धार्थ गुप्ताका अनुसार बिहीबार दिउँसो गण्डक नदीबाट चार शव निकालिएका हुन्। तीमध्ये तीन महिला र एक पुरुष छन्। प्रारम्भिक अनुमानमा शवहरू नेपालतर्फबाट नदीको माथिल्लो बहाव हुँदै बगेर आएको हुनसक्ने बताइएको छ।
शवको पहिचान तथा मृतकका आफन्तको खोजीका लागि भारतीय अधिकारीहरू नेपाल प्रशासनसँग निरन्तर सम्पर्कमा रहेको जनाइएको छ। नदी किनारमा एसडीआरएफ, आरआरटी र एसएसबीका टोलीले निरन्तर निगरानी गरिरहेका छन्।
त्यस्तै, कुशीनगरका अपर प्रहरी अधीक्षक सिद्धार्थ वर्माका अनुसार त्यहाँबाट तीन शव फेला परेका छन्। तीमध्ये दुई महिला र एक पुरुष रहेका छन्। तीनै शवलाई फ्रिजरमा सुरक्षित राखेर पहिचानको प्रक्रिया अघि बढाइएको छ।
नेपालमा भारी वर्षापछि गण्डक नदीको बहाव तीव्र बनेकाले आगामी दिनमा थप शव भारततर्फ बगेर आउन सक्ने आशंका अधिकारीहरूले गरेका छन्। सम्भावित जोखिमलाई ध्यानमा राख्दै महराजगञ्ज र कुशीनगर प्रशासनले नदी किनारमा बसोबास गर्ने सर्वसाधारणलाई सतर्क रहन आग्रह गरेको छ।