काठमाडौं । त्रिशूली नदीमा आएको भीषण बाढी र पहिरोका कारण अवरुद्ध पृथ्वी राजमार्गको धादिङ खण्ड सञ्चालनमा ल्याउन निर्माण व्यवसायीका उपकरण प्रयोग गरी सडक मर्मत तथा सफाइलाई तीव्रता दिइएको छ।
धादिङको गल्छीदेखि मुग्लिनसम्म विभिन्न स्थानमा थुप्रिएको हिलो, लेदो र पहिरो हटाउने काम जारी छ। सडक विभागका अनुसार राजमार्गका विभिन्न खण्डमा निर्माण व्यवसायीका २५ भन्दा बढी हेभी इक्विपमेन्ट तथा यान्त्रिक उपकरण परिचालन गरिएको छ।
बाढीका कारण पृथ्वी राजमार्गको करिब १५ किलोमिटर सडकखण्डमा क्षति पुगेको छ। सडक स्तरोन्नतिमा प्रयोग भइरहेका पिच प्लान्ट तथा अन्य निर्माण उपकरणसमेत बाढीले बगाएको विभागले जनाएको छ।
सडक विभागका सिनियर डिभिजन इन्जिनियर सुरेश पौडेलका अनुसार पहिरो पन्छाउने काममा विभागसँग अनुभव भए पनि ठूलो मात्रामा जम्मा भएको हिलो र लेदो व्यवस्थापनमा केही जटिलता देखिएको छ।
निर्माण व्यवसायीका पर्याप्त हेभी मेसिन परिचालन गरेर बैरेनीको करिब १ हजार ४ सय मिटर र जरेखेतको ४ सय मिटर सडकखण्डमा जमेको हिलो हटाई यातायात सञ्चालनमा ल्याइएको छ।
यद्यपि, जरेखेत क्षेत्रमा अझै सवारी आवागमनमा केही समस्या रहेको छ। त्यस्तै पोखरे, बाँगे र गलौँदी क्षेत्रमा करिब ७ सय मिटर सडकखण्डमा यातायात सञ्चालन हुन बाँकी रहेको सडक विभागले जनाएको छ।
सडक स्तरोन्नतिको जिम्मेवारी पाएको शर्मा–लामा जेडआईइसी कम्पनीका उपकरणसमेत परिचालन गरी सडकमा रहेका अवरोध हटाउने काम भइरहेको छ।
सडक विभागका अनुसार सडक सफाइ तथा मर्मतको कामले गति लिएकाले शुक्रबार साँझसम्म पृथ्वी राजमार्ग पूर्ण रूपमा सञ्चालनमा ल्याउने लक्ष्य राखिएको छ।