काठमाडौं । रसुवालाई केन्द्रबिन्दु बनाएर आएको विनाशकारी भोटेकोशी बाढीका कारण हालसम्म ९८७ जनाको मृत्यु भएको छ भने ३ हजार ९१६ जना अझै सम्पर्कविहीन रहेका छन् ।
राष्ट्रिय विपद् जोखिम न्यूनीकरण तथा व्यवस्थापन प्राधिकरणका अनुसार मंगलवार बिहान ९ बजेसम्मको तथ्याङ्कमा बाढी प्रभावित क्षेत्रमा खोज, उद्धार तथा राहत वितरण कार्यलाई उच्च प्राथमिकताका साथ अघि बढाइएको छ ।
प्राधिकरणका अनुसार बाढीमा परी ज्यान गुमाउनेहरूको शव विभिन्न जिल्लाबाट सङ्कलन गरिएको छ । सबैभन्दा बढी चितवनमा ३२१ जना (विभिन्न मानव अङ्गसहित) को शव फेला परेको छ । यस्तै, नवलपरासी पूर्वमा २१६, नवलपरासी पश्चिममा १७०, नुवाकोटमा ९५, गोरखामा ६५, धादिङमा ५५, तनहुँमा ३८ र रसुवामा २७ जनाको मृत्यु भएको पुष्टि भएको छ ।
बाढीमा परी हालसम्म २७९ जना घाइते भएका छन् । तीमध्ये १६८ जना उपचारपछि घर फर्किसकेका छन् । नेपाली सेनाले मात्रै प्रभावित क्षेत्रमा २ हजार ७४० जनालाई स्वास्थ्य उपचार प्रदान गरेको जनाएको छ ।
३ हजार ९१६ अझै सम्पर्कविहीन
सम्पर्कविहीन रहेका ३ हजार ९१६ जनामध्ये ५८३ जना विदेशी नागरिक रहेका छन् भने उनीहरूसँगै भ्रमणमा रहेका १६४ जना नेपाली नागरिक पनि सम्पर्कविहीन छन् । लाङटाङ राष्ट्रिय निकुञ्ज क्षेत्रमा समेत केही व्यक्ति सम्पर्कविहीन रहेको बताइएको छ ।
बेपत्ताहरूको खोजी तथा उद्धारका लागि सुरक्षाकर्मीहरू निरन्तर परिचालन भइरहेका छन् । विपद् व्यवस्थापन तथा उद्धारका लागि कुल २१ हजार ११ सुरक्षाकर्मी परिचालन गरिएको छ । जसमा नेपाली सेनाका ८ हजार ८९६, नेपाल प्रहरीका ७ हजार ९१२ र सशस्त्र प्रहरी बलका ४ हजार २०३ जना रहेका छन् ।
११ हजार ८१४ जनाको उद्धार
हालसम्म ११ हजार ८१४ जनाको सकुशल उद्धार गरिएको छ । नेपाली सेनाले ५७३ पटक हवाई उडान गर्दै ३ हजार ४४९ नेपाली र २५३ विदेशी नागरिकको उद्धार गरेको छ ।
यस्तै, निजी क्षेत्रका २९ वटा तथा सशस्त्र प्रहरी बलका ५० वटा हवाई उडानमार्फत समेत खोज, उद्धार तथा राहत कार्यमा सहयोग गरिएको छ ।
प्रभावित जिल्लामा आर्थिक तथा भौतिक राहत
सरकारले बाढी प्रभावित क्षेत्रका लागि आर्थिक तथा भौतिक राहत उपलब्ध गराएको छ । रसुवा र नुवाकोटलाई १–१ करोड रुपैयाँ, धादिङलाई ५० लाख रुपैयाँ तथा प्रभावित १५ वटा स्थानीय तहलाई कुल ६ करोड ७५ लाख रुपैयाँ नगद राहत उपलब्ध गराइएको छ ।
राहत सामग्रीतर्फ ३७ ट्रक र ३७ बोलेरोमार्फत खाद्यान्न तथा गैरखाद्यान्न सामग्री स्थलगत मार्गबाट प्रभावित क्षेत्रमा पठाइएको छ । यस्तै, ९ वटा हवाई उडानमार्फत राहत सामग्री ढुवानी गरिएको छ ।
हाल नुवाकोट, धादिङ, रसुवा र काठमाडौंमा रहेका होल्डिङ सेन्टरमा हजारौँ बाढी प्रभावितलाई आश्रय दिइएको छ ।
इन्धन र सञ्चार सेवा पुनःस्थापित
प्रभावित क्षेत्रमा इन्धन अभाव हुन नदिन ४२ हजार लिटर डिजेल, १८ हजार लिटर पेट्रोल र ६ हजार लिटर हवाई इन्धन मौज्दात राखिएको छ ।
सञ्चारतर्फ नेपाल टेलिकमका क्षतिग्रस्त ११० वटै टावर सञ्चालनमा आएका छन् । एनसेलका ७८ वटा टावरमध्ये ७५ वटा पुनः सञ्चालनमा ल्याइएको प्राधिकरणले जनाएको छ ।
पहिचान हुन नसकेका शवहरूलाई विभिन्न जिल्लाका २१ वटा अस्पतालमा राखिएको छ ।
– न्युज एजेन्सी नेपाल