नेपाली कम्युनिष्ट पार्टी (नेकपा)का संयोजक पुष्पकमल दाहालले रसुवाको भोटेकोशी बाढीपछि खोज तथा उद्धारमा सेनासँगै जनपरिचालन नहुँदा समस्याको वास्तविक समाधान गर्न नसकिने बताए।
प्रतिनिधिसभाको बुधवारको बैठकमा बोल्दै उनले यस्तो बताएका हुन्। उनले खोज तथा उद्धारमा नेपाली सेनाले प्रशंसनीय काम गरे पनि विपद् सामना गर्न आवश्यक जनपरिचालन हुन नसकेको बताए।
उनले सङ्घीय, प्रदेश र स्थानीय सरकार, जनप्रतिनिधि, नागरिक समाज तथा आम नागरिकलाई एकीकृत रूपमा परिचालन गरेर मात्र यो समस्याको समाधान गर्न सकिने बताए। उनले सरकारको कार्यशैलीमाथिसमेत प्रश्न उठाए।
उनले विपद्को समयमा अन्य राजनीतिक दललाई समेत विश्वासमा लिएर अघि बढ्नुपर्नेमा प्रधानमन्त्री त्यसतर्फ गम्भीर नरहेको बताए।
उनले भने, ‘यो विपद्को समयमा सेनाले गरेको खोज तथा उद्धारको कार्य देखियो। राम्रै, प्रशंसायोग्य नै छ। तर यो महाविपत्तिको सामना गर्नका लागि सबै तहको सरकार, सङ्घीय सरकार, प्रदेश सरकार, स्थानीय सरकार, जनप्रतिनिधि, नागरिक समाज र आम जनतालाई साथमा लिएर जसरी काम गर्नुपर्ने थियो, त्यो पुगेको छैन। सेना परिचालन भयो, जनपरिचालन भएन। जनपरिचालन नहुँदासम्म यो समस्या वास्तविक समाधान गर्न असम्भवजस्तै हुन्छ भनेर पनि मैले भनेँ। सेना परिचालनसँगै जनपरिचालन जोडिएन भने, केन्द्रीय सरकारसँगै प्रादेशिक र स्थानीय सरकार जोडिएन भने यो समस्याको समाधान गर्न कठिन हुन्छ भन्ने कुरा मैले पटक–पटक भनेको थिएँ। र आज पनि भन्न चाहन्छु।’
उनले प्रधानमन्त्री साहले आफ्नै दलका सांसदहरूलाई समेत विश्वासमा लिन नसकेको टिप्पणी गरे।