काला सागरमा नागरिक समुन्द्री यातायातको सुरक्षामा राष्ट्रपति एर्दोगानको जोड

टर्कीका राष्ट्रपति रेसेप तैयप एर्दोगानले काला सागर (ब्ल्याक सी) मा नागरिक समुन्द्री यातायातको सुरक्षा सुनिश्चित गर्नु अत्यन्त महत्वपूर्ण रहेको बताएका छन् । किर्गिस्तानको बिस्केकमा आयोजित साङ्घाई सहयोग सङ्गठन (एससीओ) शिखर सम्मेलन २०२६ मा सहभागी भई स्वदेश फर्कने क्रममा सञ्चारकर्मीहरूसँग कुराकानी गर्दै राष्ट्रपति एर्दोगानले यस्तो धारणा व्यक्त गरेका छन् । टर्कीको अर्ध–सरकारी समाचार एजेन्सी अनादोलुकाअनुसार उहाँले जहाजमै उक्त अन्तर्वार्ता दिएका छन् । राष्ट्रपति एर्दोगानले विभिन्न पक्षहरूबीच उत्पन्न हुने द्वन्द्वले सर्वसाधारणको सुरक्षा र व्यावसायिक गतिविधिलाई असर गर्ने अवस्था सृजना हुन नहुनेमा जोड दिएका छन् । द्वन्द्वका कारण व्यापारिक मार्ग र नागरिक आवागमनमा अवरोध पुग्न नहुने उहाँको भनाइ थियो । पछिल्ला महिनाहरूमा काला सागरमा टर्कीसँग आबद्ध व्यापारिक जहाजहरूमा भएका केही घटनाहरूपश्चात् राष्ट्रपतिको यस्तो टिप्पणी आएको हो । टर्कीले काला सागरमा सुरक्षित र निर्बाध व्यावसायिक नौवहनको आवश्यकतालाई अन्तर्राष्ट्रिय मञ्चहरूमा निरन्तर उठाउँदै आएको छ ।