एजेन्सी । कुवेतको राजधानी कुवेत सिटीमा आवास तथा सहरी विकास मञ्च २०२६ मंगलवारदेखि शुरु भएको छ । मञ्चसँगै बैती भवन प्रदर्शनीको छैटौँ संस्करण पनि आयोजना गरिएको छ । कार्यक्रममा कुवेतका सरकारी अधिकारी, लगानीकर्ता, घरजग्गा विकासकर्ता तथा आवास, घरजग्गा र निर्माण क्षेत्रसँग सम्बन्धित विभिन्न कम्पनीका प्रतिनिधिहरू सहभागी भएका छन् ।
कार्यक्रमको उद्घाटनमा कुवेतका नगरपालिका मामिला तथा आवास मामिलासम्बन्धी राज्यमन्त्री अब्दुल लतिफ हामेद हमद अल–मिशारी सहभागी हुनुभयो । मञ्चमा शहरी विकास, नयाँ आवासीय सहरमा लगानीका अवसर तथा आवास विकासमा निजी क्षेत्रको भुमिका लगायतका विषयमा छलफल गरिएको छ । कार्यक्रममा चिनियाँ कम्पनीहरूको पनि सहभागिता रहेको छ । सहभागी कम्पनीमध्ये चाइना स्टेट कन्स्ट्रक्सन इन्जिनियरिङ कर्पोरेसनको कुवेतस्थित सहायक कम्पनी पनि रहेको छ ।
कम्पनीका कुवेत महाप्रवन्धक जी ताओकाअनुसार कम्पनीले विभिन्न पक्षसँग सहरी योजना, निर्माण अभ्यास तथा पूर्वनिर्मित र मोड्युलर भवन प्रविधिबारे विचार आदानप्रदान गरेको छ । उहाँले कार्यक्रममा सहभागी हुने अवसरलाई कम्पनीले महत्वपूर्ण रूपमा लिएको र सक्रिय रूपमा सहभागिताको तयारी गरेको बताउनु भयो ।
आयोजककाअनुसार बैती भवन प्रदर्शनीको छैटौँ संस्करण सेप्टेम्बर ८ देखि १२ सम्म सञ्चालन हुनेछ । प्रदर्शनीमा निर्माण सामग्री, निर्माण प्रविधि, विद्युतीय प्रणाली तथा आन्तरिक सजावटलगायतका क्षेत्रमा कार्यरत ७० भन्दा बढी स्वदेशी तथा अन्तर्राष्ट्रिय कम्पनी सहभागी छन् ।