काठमाडौं । नेकपा एमालेको पुनर्गठन कार्यदलका नेताहरू पार्टी पुनर्गठनसँग सम्बन्धित प्रतिवेदनमाथि थप छलफल गर्न काभ्रेको बल्थली पुगेका छन्।
बल्थलीस्थित एक रिसोर्टमा आवासीय रूपमा भइरहेको बैठकमा पार्टी पुनर्गठनका विषयमा तयार गरिएका दुई छुट्टाछुट्टै प्रतिवेदनमाथि छलफल भइरहेको छ। शुक्रबार च्यासलमा बसेको कार्यदलको बैठकमा दुवै प्रतिवेदन प्रस्तुत गरिए पनि विस्तृत छलफलका लागि थप समय आवश्यक भएपछि नेताहरू आवासीय बैठकका लागि बल्थली गएका हुन्।
कार्यदलका सदस्यहरूले शनिबार साँझदेखि नै छलफल सुरु गरेका थिए भने आइतबार बिहानदेखि बैठकलाई निरन्तरता दिइएको छ। बैठकमा दुवै प्रतिवेदनका विषयवस्तुमा सहमति जुटाएर साझा दस्तावेज तयार गर्ने प्रयास भइरहेको बताइएको छ।
एमालेले गत २१ फागुनको निर्वाचनमा व्यहोरेको पराजयपछि पार्टीभित्र सुधार तथा पुनर्गठनका लागि सुझाव संकलन गरेको थियो। ३० जेठदेखि १९ असारसम्म विभिन्न तहका नेता तथा कार्यकर्ताबाट प्राप्त सुझावलाई समेटेर महासचिव शंकर पोखरेलले निर्वाचन समीक्षा र पार्टी पुनर्गठनसँग सम्बन्धित प्रतिवेदन तयार गरेका छन्।
कार्यदलका सदस्य सचिवसमेत रहेका पोखरेलले १३ समूहबाट प्राप्त सुझावका आधारमा प्रतिवेदन तयार पारेका हुन्। यता, कार्यदल संयोजक उपाध्यक्ष रामबहादुर थापाले पुनर्गठनसम्बन्धी विषयमा छुट्टै प्रतिवेदन प्रस्तुत गरेका छन्। थापाको प्रतिवेदनप्रति असहमति जनाउँदै ३९ पृष्ठ लामो अलग प्रतिवेदनसमेत तयार भएको बताइएको छ।
शुक्रबार दुवै प्रतिवेदन कार्यदलको बैठकमा प्रस्तुत भएपछि त्यसमा विस्तृत छलफलका लागि नेताहरू बल्थली पुगेका हुन्।
एमाले प्रचार विभाग प्रमुख निरज आचार्यका अनुसार छलफललाई आवश्यकताअनुसार निरन्तरता दिइनेछ। उनका अनुसार नेताहरूले बल्थलीमै बसेर छलफल अघि बढाउने र भोलि निष्कर्षसहित फर्कने तयारी गरेका छन्।