गत संस्करणको कांस्य पदक विजेता नेपालले जापानमा जारी २० औं एशियाली खेलकुदको महिला कबड्डीमा मंगलवार थाइल्यान्डमाथि रोमाञ्चक जितसहित सुरुवात गरेको छ।
नेपाली महिला टोली चीनमा भएको गत संस्करणको १९ औं एशियाली खेलकुदको कांस्य विजेता हो। अपेक्षा गरिएको खेलमध्ये एक नेपाली महिला कबड्डी टोलीले उत्कृष्ट पुनरागमन जितसँगै एसियाली खेलकुदको सुरुवात गरेको छ।
टोकाई सिटिजेन जिम्नाजियममा मंगलवार भएको समूह ‘बी’ को खेलमा नेपालले थाइल्यान्डलाई ४६–४३ ले हरायो। पहिलो हाफमा १५–२४ ले पछि परेको नेपालले दोस्रो हाफमा उत्कृष्ट पुनरागमन गर्दै तीन मिनेट बाँकी छँदा ३९–३९ को बराबरीमा भेट्टायो। त्यसपछि लगातार अंक जोड्दै नेपालले अग्रता लियो।
दोस्रो हाफमा नेपालले थाइल्यान्डलाई दुईपल्ट अलआउट गर्न सफल भयो। त्यसअघि पहिलो हाफमा नेपाल पनि दुईपल्ट अलआउट भएको थियो। नेपालको जितमा रबिना चौधरीले उत्कृष्ट प्रदर्शन गरिन्।
नेपालले अब बुधवार चाइनिज ताइपेइसँग खेल्नेछ। चार टोली रहेको समूह ‘बी’ का शीर्ष दुई टोली सेमिफाइनलमा पुग्नेछन्। समूहमा नेपाल, थाइल्यान्ड, श्रीलंका र चाइनिज ताइपेइ छन्।