इजिप्टले जल व्यवस्थापनका क्षेत्रमा चीनसँगको सहकार्यलाई व्यापक सम्भावनाका रूपमा अगाडि सारेको छ । इजिप्टका जलस्रोत तथा सिँचाइमन्त्री हानी सेविलमले चीनसँग रहेको उन्नत प्रविधि र अनुभवले आफ्नो मुलुकको जल व्यवस्थापन प्रणालीलाई आधुनिकीकरण गर्न महत्वपूर्ण भूमिका खेल्ने बताएका छन् ।
एक पत्रकार सम्मेलनमा बोल्दै मन्त्री सेविलमले चीनसँगको सहकार्यले दुवै देशका लागि ‘विन–विन’ (दुवै पक्षलाई फाइदाजनक) वातावरण सिर्जना गर्ने विश्वास व्यक्त गरे । उनले दुवै मुलुकका उच्च नेतृत्वबीचको सम्बन्धले यस क्षेत्रमा साझेदारीलाई थप बलियो बनाउने अवसर प्रदान गरेको उल्लेख गरे ।
इजिप्ट हाल विश्वमै जल संकटको उच्च जोखिममा रहेका मुलुकहरूमध्ये एक हो । सरकारी तथ्यांकअनुसार इजिप्टको ९८ प्रतिशतभन्दा बढी नवीकरणीय जलस्रोत मुलुकको सीमाना बाहिरबाट आउने गर्छन् । यस्तो अवस्थामा पानीको कुशल व्यवस्थापन र मितव्ययी प्रयोग इजिप्टका लागि अनिवार्य आवश्यकता बनेको छ ।
यसैबीच, आगामी अक्टोबरमा आयोजना हुन लागेको ‘क्यारो वाटर विक’मा चिनियाँ प्रतिनिधिमण्डलको सहभागिता रहनेछ । मन्त्री सेविलमका अनुसार उक्त कार्यक्रमले दुई देशबीच छलफल र सहकार्यका नयाँ मार्गहरू खोल्नेछ ।
इजिप्टले आफ्नो जल क्षेत्रमा डिजिटल रूपान्तरण र आधुनिक प्रविधि भित्र्याउने योजनालाई प्राथमिकताका साथ अघि बढाएको छ ।