पाकिस्तानले अफगानिस्तानसँगको सीमा क्षेत्रमा रहेका लडाकुहरूको अखडालाई लक्षित गरी गरेको हवाई आक्रमणमा २८ जना लडाकु मारिएको दाबी गरेको छ । पाकिस्तानको सूचना तथा प्रसारण मन्त्रालयका अनुसार सोमबार गरिएको यस कारबाहीमा एक आत्मघाती बमवर्षक तालिम केन्द्रसहित तीनवटा महत्वपूर्ण अखडा ध्वस्त भएका छन् ।
पाकिस्तानी सुरक्षा निकायले प्राप्त गरेको विश्वसनीय गुप्तचर सूचनाका आधारमा कारबाही अघि बढाइएको मन्त्रालयले जनाएको छ । मारिनेहरूमा धेरै आत्मघाती हमलाकारीसमेत रहेको दाबी गरिएको छ । हवाई आक्रमणका क्रममा लडाकु समूहले लुकाएर राखेको ठूलो परिमाणको हातहतियार तथा गोलाबारुदसमेत नष्ट भएको बताइएको छ ।
हवाई कारबाहीका अतिरिक्त पाकिस्तानले उत्तर–पश्चिमी खैबर पख्तुनख्वा प्रान्तका कोहाट, हङ्गु र थल क्षेत्रमा विशेष स्थलगत सैन्य अपरेसन पनि सञ्चालन गरेको छ । हालैका दिनमा सो क्षेत्रमा लडाकु समूहबाट भएका शृंखलाबद्ध आक्रमणको प्रतिशोधस्वरूप यो कारबाही गरिएको हो ।
स्थलगत कारबाहीमा थप ९ जना लडाकु मारिएको र केही घाइते भएको सरकारी स्रोतले जनाएको छ । नागरिक हताहतीको प्रश्नमा मन्त्रालयले कारबाहीका क्रममा सर्वसाधारणको ज्यान नजाओस् भन्ने कुरामा पूर्ण सावधानी अपनाइएको दाबी गरेको छ ।
पाकिस्तान क्षेत्रीय शान्ति र स्थायित्वका लागि प्रतिबद्ध रहेको बताउँदै आफ्ना नागरिकको सुरक्षा नै राज्यको सर्वोच्च प्राथमिकता भएको मन्त्रालयले पुनः दोहोर्याएको छ ।
यता, अफगानिस्तान सरकारका प्रवक्ताले पाकिस्तानद्वारा गरिएको हवाई आक्रमणको पुष्टि गरेका छन् । तर, पाकिस्तानी दाबीविपरीत अफगान पक्षले उक्त आक्रमणमा तीन जना सर्वसाधारणको समेत मृत्यु भएको जनाएको छ ।