राष्ट्रिय प्रजातन्त्र पार्टीका संसदीय दलका नेता ज्ञानबहादुर शाहीले जेन–जी आन्दोलनका दोषीलाई कारबाही किन नगरेको भन्दै सरकारसँग प्रश्न गरेका छन्।
मंगलबारको प्रतिनिधि सभा बैठकमा बोल्दै उनले जेन–जी आन्दोलनका दोषीलाई कारबाही गर्न राष्ट्रिय मानव अधिकार आयोगले सिफारिस गरेको ६ महिना बितिसक्दा पनि उनीहरूलाई किन पक्राउ नगरिएको भन्दै सरकारलाई प्रश्न गरेका हुन्। दोषीलाई पक्राउ गर्न नसके सत्ता छोड्नसमेत उनले आग्रह गरे।
उनले भोटेकोशी बाढीका कारण सुरुङ दुर्घटनामा फसेका नागरिकको उद्धारमा राज्यले चरम ढिलासुस्ती गरेको भन्दै आपत्ति जनाए। राज्यसँग स्रोत र साधनको पहुँच हुँदाहुँदै उद्धारमा भएको सात दिनको ढिलाइका कारण बाँच्न सक्ने नागरिकको ज्यान गएको भन्दै उनले यसलाई राज्यद्वारा गरिएको ‘हत्या’ को संज्ञा दिए।
उनले भने, ‘म सरकारलाई एउटा प्रश्न गर्न चाहन्छु, तपाईंकै सत्तापक्ष पार्टीकी सांसद हुनुहुन्छ, जेनजी आन्दोलनकी आमा अहिले रुनुभयो संसद्मा। तपाईंले सरकार चलाएको ६ महिना भयो। राष्ट्रिय मानव अधिकार आयोगले को–को दोषी हुन् भनेर प्रमाणसहित बुझाएको आज ६ महिना भयो। अपराधीलाई आजसम्म किन पक्रिनुभएको छैन? यदि पक्रिन सक्नुहुन्न भने यो सत्ताको कुर्सीमा किन बसिराख्नुभएको छ? यो प्रश्न ती आमाको आँखाको आँसु पुछ्नुस्। जेनजी आन्दोलनमा जो–जो अपराधी छन्, चाहे सत्तापक्षका हुन्, चाहे प्रतिपक्षका हुन्, यिनलाई समाउँदै जेल हाल्नुस्।’
सांसद शाहीले राज्यसँग खर्बौँको बजेट र सुरक्षा जनशक्ति भए पनि नागरिकको जीवन बचाउन नसक्नु लज्जास्पद भएको टिप्पणी गरे।