नेपालस्थित अस्ट्रेलियाली दूतावासले अस्ट्रेलिया जान खोजिरहेका नेपाली नागरिकलाई भिसाको नाममा हुने ठगीबाट सतर्क रहन आग्रह गरेको छ। विशेषगरी आकर्षक आश्वासन दिएर रकम असुल्ने अनधिकृत एजेन्ट तथा बिचौलियाबाट सावधान हुन दूतावासले सुझाव दिएको छ।
दूतावासका अनुसार छोटो समयमै भिसा निकालिदिने, भिसा निश्चित रूपमा स्वीकृत गराइदिने वा अस्ट्रेलिया पुगेपछि सजिलै अर्को प्रकारको भिसा लिन सकिने भन्दै पैसा माग्ने व्यक्तिको विश्वासमा पर्नु जोखिमपूर्ण हुन सक्छ।
भिसाको ग्यारेन्टी गर्ने दाबीमा विश्वास नगर्नुहोस्
कुनै एजेन्टले ‘१०० प्रतिशत भिसा ग्यारेन्टी’ भन्दै ठूलो रकम अग्रिम मागेमा सावधानी अपनाउनुपर्ने दूतावासको भनाइ छ। यस्ता ठगीबाट पैसा गुम्नुका साथै राहदानी तथा व्यक्तिगत विवरण दुरुपयोग हुने खतरा पनि रहन्छ।
भिसा स्वीकृत गर्ने अधिकार अस्ट्रेलिया सरकारको सम्बन्धित निकायसँग मात्र हुन्छ। त्यसैले एजेन्टले भिसा पक्का गरिदिने दाबी गरेकै आधारमा विश्वास गर्नु उचित हुँदैन।
पर्यटक भिसामा काम गर्न पाइँदैन
दूतावासले पर्यटक वा ट्रान्जिट भिसामा अस्ट्रेलिया पुगेर रोजगारी गर्न पाइन्छ भन्ने प्रचारलाई गलत भनेको छ। त्यस्तै, विद्यार्थी भिसामा समेत काम गर्न निश्चित नियम र समयसीमा लागू हुने भएकाले एजेन्टले दिएको जानकारीभन्दा सरकारी स्रोतबाट नियम जाँच गर्न सुझाव दिइएको छ।
गलत कागजात पेस गर्दा गम्भीर असर
भिसा आवेदनमा गलत व्यक्तिगत विवरण, झुटा जानकारी वा नक्कली कागजात प्रयोग गर्नु आवेदककै लागि ठूलो समस्या बन्न सक्छ। यस्तो अवस्थामा आवेदन अस्वीकृत वा भिसा रद्द हुन सक्ने तथा भविष्यका आवेदनमा समेत नकारात्मक असर पर्न सक्ने चेतावनी दिइएको छ।
आवेदनमा समावेश गरिने विवरण सही छ कि छैन भन्ने जिम्मेवारी आवेदक स्वयंको हुने भएकाले एजेन्टले तयार पारेको कागजात र विवरण पनि बुझेर मात्र पेस गर्न दूतावासले आग्रह गरेको छ।
सामाजिक सञ्जालबाट सम्पर्क गर्ने एजेन्टसँग सावधान
फेसबुक, ह्वाट्सएप वा अन्य माध्यमबाट सम्पर्क गरेर राहदानी माग्ने, आवेदनमा गलत विवरण राख्न दबाब दिने वा आवेदकलाई आफ्नै इमिग्रेसन खाताको पहुँच नदिने व्यक्तिसँग कारोबार गर्दा विशेष सावधानी अपनाउनुपर्ने बताइएको छ।
अध्यागमनसम्बन्धी सेवा लिँदा सम्बन्धित निकायमा दर्ता भएको आधिकारिक माइग्रेसन एजेन्ट हो कि होइन भनेर जाँच गर्न पनि दूतावासले सुझाव दिएको छ।
संरक्षणसम्बन्धी भिसाको दुरुपयोग नगर्न चेतावनी
अस्ट्रेलिया पुगेपछि बसाइ लम्ब्याउने उद्देश्यले झुटा आधारमा संरक्षण वा शरणसम्बन्धी आवेदन दिने प्रयास नगर्न पनि दूतावासले चेतावनी दिएको छ। वास्तविक आधारबिना गलत दाबी गरेमा आवेदन अस्वीकृत हुनुका साथै भविष्यको अध्यागमन प्रक्रियामा गम्भीर असर पर्न सक्ने बताइएको छ।
सही जानकारी कहाँबाट लिने?
भिसासम्बन्धी नियम, आवेदन प्रक्रिया र आवश्यक कागजातबारे जानकारी लिँदा अस्ट्रेलिया सरकारको आधिकारिक स्रोतलाई प्राथमिकता दिन दूतावासले आग्रह गरेको छ।
एजेन्टमार्फत आवेदन दिने हो भने सम्बन्धित आधिकारिक दर्ता प्रणालीमा उसको विवरण जाँच गरेर मात्र सेवा लिनु सुरक्षित हुन्छ। भिसा प्रक्रिया बुझेर, कागजात आफैंले पनि जाँच गरेर र कुनै पनि ‘ग्यारेन्टी’को प्रलोभनमा नपरी अघि बढ्नु नै ठगीबाट बच्ने महत्वपूर्ण उपाय हो।