नेकपा एमालेले अध्यक्ष केपी शर्मा ओलीको राजनीतिक प्रतिवेदनमा समेटिएका विषय र त्यसको सन्देश पार्टीको स्थानीय तहसम्म पुर्याउने निर्णय गरेको छ।
बिहीबार बसेको पार्टी सचिवालय बैठकमा केन्द्रीय समितिबाट पारित राजनीतिक प्रतिवेदनलाई पार्टीका सबै तहमा समान ढंगले बुझाउने विषयमा छलफल भएको हो।
बैठकपछि उपमहासचिव लेखराज भट्टले प्रतिवेदनले पार्टीभित्र एकताको वातावरण निर्माण गर्न सहयोग गरेको धारणा बैठकमा राखिएको जानकारी दिए। उनका अनुसार अध्यक्षको प्रतिवेदनलाई एउटै बुझाइका साथ तल्लो तहका नेता तथा कार्यकर्तासम्म पुर्याउने विषयमा सचिवालयमा छलफल भएको हो।
सचिवालय बैठकमा पार्टीको केन्द्रीय कमिटी विस्तारसँग सम्बन्धित विषयमा पनि छलफल भएको बताइएको छ। विशेषगरी केन्द्रीय सदस्य मनोनयन तथा पछिल्लो समय पार्टी एकीकरणका माध्यमबाट एमालेमा आबद्ध भएका नेताहरूलाई केन्द्रीय कमिटीमा समावेश गर्ने विषय बैठकमा उठेको थियो।
मनोनयनसम्बन्धी प्रस्तावलाई आवश्यक पार्टीगत प्रक्रियाबाट टुंगो लगाएपछि सम्बन्धित निर्णय सार्वजनिक गर्ने तयारी रहेको बताइएको छ।
यससँगै एमालेले अध्यक्षको राजनीतिक प्रतिवेदनलाई संगठनका विभिन्न तहमा लैजाने र त्यसमा उल्लेखित राजनीतिक तथा संगठनात्मक सन्देशबारे पार्टीभित्र समान धारणा विकास गर्ने प्रक्रिया अघि बढाउने भएको छ।