काठमाडौँ । काठमाडौंमा प्रहरीले सञ्चालन गरेको विशेष स्वीप अपरेशनका क्रममा २४ घण्टाभित्र १५१ जना पक्राउ परेका छन्।
जिल्ला प्रहरी परिसर काठमाडौंका अनुसार पक्राउ पर्नेमा १४१ जना पुरुष र १० जना महिला रहेका छन्। सुरक्षित काठमाडौंको अवधारणाअनुसार शान्ति–सुरक्षा कायम गर्ने उद्देश्यले विभिन्न क्षेत्रमा लक्षित रूपमा अभियान सञ्चालन गरिएको प्रहरीले जनाएको छ।
प्रहरीका अनुसार पक्राउ परेकामध्ये सार्वजनिक सेवा प्रवाहमा अवरोध पुर्याउने, सर्वसाधारणसँग हातपात तथा हुलहुज्जत गर्ने र चोरी तथा लुटपाटमा संलग्न वा त्यस्ता गतिविधिको पृष्ठभूमि भएका व्यक्तिहरू रहेका छन्।
त्यस्तै, बिचौलियाको भूमिकामा रहेका तथा गुण्डागर्दीजस्ता गतिविधिसँग जोडिएका व्यक्तिहरूमाथि पनि अभियानका क्रममा कारबाही गरिएको प्रहरीले जनाएको छ।
प्रहरीले काठमाडौं उपत्यकामा सुरक्षा व्यवस्था थप प्रभावकारी बनाउन यस्ता लक्षित अभियानलाई निरन्तरता दिने जनाएको छ।