सूचना तथा सञ्चारमन्त्री डा. विक्रम तिमिल्सिनाले बाढीका कारण क्षतिग्रस्त दूरसञ्चार पूर्वाधारको मर्मत कार्य तीव्रताका साथ अघि बढाइएको बताएका छन्।
बुधवारको प्रतिनिधि सभा बैठकमा बोल्दै मन्त्री तिमिल्सिनाले भोटेकोशी र पछिल्ला बाढीका कारण दूरसञ्चार क्षेत्रमा करिब ८ करोड ८५ लाख रुपैयाँ बराबरको भौतिक क्षति पुगेको बताएका हुन्। उनले बाढीबाट प्रभावित क्षेत्रमा दूरसञ्चार सेवालाई प्राथमिकताका साथ पुनर्स्थापना गरिएको बताए।
उनका अनुसार भोटेकोशी बाढीबाट नेपाल टेलिकमका तीनवटा टावर पूर्ण रूपमा क्षतिग्रस्त भएका थिए। तीमध्ये प्रभावित साइटहरूमा वैकल्पिक टावरको व्यवस्था गरी सञ्चार सेवा अवरुद्ध हुन नदिइएको उनले बताए। हेलिकोप्टरमार्फत उपकरण ढुवानी गरी रसुवागढी क्षेत्रमा सोलार प्रणालीसहितको टावर सञ्चालनमा ल्याइएको पनि उनले जानकारी दिए।
त्यस्तै, पछिल्लो बाढीले गण्डकी प्रदेशका ११ जिल्लामा कुल २९१ वटा साइटमा क्षति पुर्याएकोमा हालसम्म २४६ वटा साइट सञ्चालनमा आइसकेका छन्। बाँकी ४५ वटा साइटमा विद्युत् आपूर्ति सुचारु हुनेबित्तिकै सेवा सञ्चालनमा आउने मन्त्री तिमिल्सिनाले बताए। यसका लागि ऊर्जा मन्त्रालयसँग समन्वय गरी प्राविधिक टोली तथा जेनेरेटर परिचालन गरिएको उनले जानकारी दिए।
दूरसञ्चार सेवासँगै फाइबर नेटवर्क र ब्याकबोन ट्रान्समिसनमा पुगेको क्षतिको पनि क्रमशः मर्मत भइरहेको उनले बताए। कतिपय स्थानमा फाइबर काटिएपछि वैकल्पिक रूपमा माइक्रोवेभ प्रविधिमार्फत सञ्चार सेवा सञ्चालन गरिएको उनको भनाइ छ।